ბოლო დროს ჩვენს ქვეყანაში ერთერთი აქტუალური საკითხია, რამდენად სანდოა შენობები საცხოვრებლად და რა მოხდება იმ შემთხვევაში, თუკი ავარიული კორპუსების შესაფასებლად შესაბამისი ნაბიჯები არ გადაიდგმება. ეს პრობლემა განსაკუთრებით მას შემდეგ გახდა განხილვის საგანი, რაც ბათუმში მრავალსართულიანი შენობის ერთი სადარბაზო ჩამოინგრა.
„თბილისი თაიმსთან“ საუბრისას საკითხს მენაშენეთა ასოციაციის თავმჯდომარე, არქიტექტორი ირაკლი როსტომაშვილი აფასებს.
„პირველ ყოვლისა, უნდა მოხდეს პრობლემის ზუსტად შესწავლა. ანუ. ზოგადად, უნდა ვიცოდეთ, რას ნიშნავს “‘ავარიული სახლი”. არსებობს სხვადასხვა ტიპის ავარიული სახლი. თითოეულს სჭირდება სხვადასხვანაირი მიდგომა. საჭიროა პროფესიონალების მიერ ყველა შენობაზე კონკრეტული დასკვნის შემუშავება და დაწერა. უპირველესად, სწორედ ეს არის გასაკეთებელი.
ჩემი აზრით, პრობლემა გახლავთ ის, რომ არ არის პოლიტიკური ნება. ოცი წელია, არ დაადგა საშველი საკითხის გადაჭრას. 2002 წელს, თბილისის მიწისძვრის შემდეგ დაიწყო საუბარი, რომ უნდა დაწყებული მთელი საცხოვრებელი ფონდის აღწერა და შესწავლა. თუმცა, ცხადია, პრობლემა იქამდეც არსებობდა. მაშინ დავიწყეთ რაღაც პროცესი, რაც მალევე შეწყდა“, – აღნიშნავს არქიტექტორი.
როგორც როსტომაშვილი აღნიშნავს, პრობლემა აუცილებლად გადასაჭრელია.
„მე პირადად, სადაც ხმა მიმიწვდება, ყველგან ვაფიქსირებ საკუთარ პოზიციას, რომ ეს პრობლემა აუცილებლად გადასაჭრელია. მომყავს მაგალითი – მკითხველმა რომ კარგად გაიგოს: წარმოიდგინეთ, არის საავადმყოფო, სადაც ასი ავადმყოფია. ექიმი, ცხადია, დაიწყებს დიაგნოზის დასმით, თუ რომელ პაციენტს რა აწუხებს. ასეა შენობებთან მიმართებით – ისინი სხვადასხვა ტიპის ავარიულებია. ზოგი გახლავთ ავარიული იმიტომ, რომ საძირკველია დაზიანებული; ზოგი შენობა მიშენებების გამოა დაზიანებული; ზოგი იმიტომ, რომ კედლები გამოანგრიეს და ა.შ. ყველა სახლზე გასაკეთებელია დასკვნა და აუცილებელია, დაისვას სწორი დიაგნოზი. შემდეგ უკვე, ამის მიხედვით, უნდა ვიფიქროთ, “როგორ ვუმკურნალოთ ამ კონკრეტული დიაგნოზის პაციენტს“, – განმარტავს ირაკლი როსტომაშვილი „თბილისი თაიმსთან“ საუბრისას.
შეგახსენებთ, ბათუმში 8 ოქტომბერს საცხოვრებელი კორპუსი ჩამოინგრა. შემთხვევას 9 ადამიანი ემსხვერპლა.
მასალა მომაზადა : მარიამ ტიელიძემ
