ისრაელის პრემიერ-მინისტრმა, ნაფტალი ბენეტმა განაცხადა, რომ ისრაელი საგანგებო სიტუაციის ზღვარზეა მას შემდეგ, რაც ისრაელში, სამხრეთ აფრიკაში გამოვლენილი კორონავირუსის ახალი ვარიანტის გავრცელების პირველი შემთხვევა დაფიქსირდა.
„ამჟამად საგანგებო სიტუაციის ზღვარზე ვიმყოფებით. ყველას ვთხოვ, მოემზადონ და სრულად ჩაერთონ მუშაობაში. ახალი ვარიანტი უფრო გადამდებია და ბევრად უფრო სწრაფად ვრცელდება, ვიდრე „დელტა“ შტამი“, – აღნიშნა ისრაელის პრემიერმა.
ნაფტალი ბენეტის თქმით, ისრაელის ხელისუფლება თვალყურს ადევნებს სამხრეთ აფრიკიდან მონაცემებს, რათა მეტი გაიგოს ახალი შტამის შესახებ, მათ შორის არის თუ არა ის რეზისტენტული არსებული ვაქცინების მიმართ.
ისრაელში, სამხრეთ აფრიკაში გამოვლენილი კორონავირუსის ახალი ვარიანტის გავრცელების პირველი შემთხვევა დაფიქსირდა. ახალი შტამით ინფიცირებული პირი ისრაელის მოქალაქეა, რომელიც სამშობლოში მალავიდან დაბრუნდა.
სამხრეთ აფრიკაში, მეცნიერებმა განაცხადეს, რომ კორონავირუსის ახალი ვარიანტი აღმოაჩინეს, რომელსაც უამრავი მუტაცია აქვს. სამხრეთ აფრიკაში აღმოჩენილი კორონავირუსის ახალი ვარიანტის გამო, ჯანდაცვის მსოფლიო ორგანიზაცია საგანგებო შეხვედრას გამართავს. ჯანდაცვის მსოფლიო ორგანიზაციის მთავარმა მეცნიერმა, სუმია სვამინატანმა განაცხადა, რომ ახალ ვარიანტს სპაიკის პროტეინში არაერთი შემაშფოთებელი მუტაცია აქვს.
ისრაელმა სამხრეთ აფრიკა, ლესოტო, ბოტსვანა, ზიმბაბვე, მოზამბიკი, ნამიბია და ესვატინი ე.წ. წითელ სიაში შეიყვანა.
