„ხანუქა რწმენის, განახლებისა და სინათლის სიბნელეზე გამარჯვების დღესასწაულია“ – ირაკლი ღარიბაშვილმა ებრაელებს ხანუქა მიულოცა

მოგეხსენებათ, ებრაელების უდიდესი დღესასწაული, ხანუქა უკვე დაიწყო. ხანუქა, რომელიც სიტყვასიტყვით განახლებას ნიშნავს, იდღესასწაულება ნოემბერ-დეკემბრის თვეში და ამით ებრაელი ერი იხსენებს იმ სასწაულს, როცა ტაძარში აღმოჩენილი ერთი დღის სამყოფი ზეთი რვა დღის განმავლობაში ენთო. სწორედ ამიტომ, დღესასწაულისას რვა დღის განმავლობაში, სასანთლეზე მენორა ინთება.
ხანუქა ებრაელებისთვის უდიდესი რელიგიური დღესასწაულია, მას უდიდესი სიმბოლური დატვირთვაც გააჩნია, ვინაიდან იგი მიიჩნევა ბერძნებისგან შელახული ტაძრის განახლების დღესასწაულად.
დღეს, თბილისის დიდ სინაგოგაში ხანუქას დღესასწაული ებრაელებს საქართველოს პრემიერ-მინისტრმა, ირაკლი ღარიბაშვილმა მიულოცა.
ირაკლი ღარიბაშვილმა ხაზი გაუსვა ქართველებისა და ებრაელების 26 საუკუნოვან ძმობას, რომლის ანალოგიც მთელ მსოფლიოში არ მოიძებნება
„ხანუკა სამეახ!, ყველას გილოცავთ დღევანდელ დღეს, ხანუქა რწმენის, განახლებისა და სინათლის სიბნელეზე გამარჯვების დღესასწაულია.. ჩემო ებრაელო ძმებო, ჩემთვის დღეს აქ, თქვენთან ერთად, ჩვენს ძვირფას და საყვარელ ებრაელ თემთან ერთად ყოფნა და დღევანდელი დღის, ამ დიდებული დღესასწაულის აღნიშვნა დიდი პატივია..“- განაცხადა ირაკლი ღარიბაშვილმა

მასალა მოამზადა: თორნიკე ყრუაშვილმა