წარმატების მიღწევა ქართველი ახალგაზრდებისთვის უდიდესი სურვილი და ერთ-ერთი მთავარი მიზეზია. ჩვენს ქვეყანაში რეალურად ცოტაა წარმატებული ადამიანი, წარუმეტებელი კი ბევრი, სწორედ წარმატებს მოპოვების ფსიქოლოგიაზე საუბრით გაიხსნა საქართველოს საპატრიარქოს წმიდა ანდრია პირველწოდებულის სახელობის ქართულ უნივერსიტეტში საჯარო ლექციათა კურსი, რომელიც ამავე უნივერსიტეტის თვითმმართველობის, კერძოდ კი განათლებისა და მეცნიერების კლუბის მიერაა ორგანიზებული. ლექციათა კურსი სასწავლო წლის განმავლობაში სულ 10 საჯარო ლექციას მოიცავს, აქედან 8 ლექციაზე დამსწრე სტუდენტს კი გადაეცემა სერტიფიკატი. პირველი საჯარო ლექცია გახსნა სოციალურ მეცნიერებათა და სამართალმცოდნეობის ფაკულტეტის პროფესორმა, ფსიქოლოგმა, ევროპაში EAGT-ის აკრედიტირებულმა ფსიქოთერაპევტმა, სუპერვიზიორმა თეა გოგოტიშვილმა.
თეა გოგოტიშვილი: – საჯარო ლექციაზე სტუდენტების დასწრება ძალიან მნიშვნელოვანია, რადგან საჯარო ლექციაზე ისეთი ინტერესების გაჩენა, გაღვივება და განვითარება ხდება, რომელიც სხვა შემთხვევაში, შეიძლება, როგორც აქტუალური საკითხი არც კი იყოს გაცნობიერებული. საჯარო ლექციაზე ხდება ისეთი მნიშვნელოვანი თემების აღმოჩენა, რომელიც სტუდენტის პროფესიული ზრდისთვის პირდაპირ აუცილებელია.
მარიამ გელაშვილი – ორგანიზატორი: – ქართული უნივერსიტეტის თვითმმართველობის განათლებისა და მეცნიერების კლუბის ინიციატივით ხორციელდება საჯარო ლექცია- სემინარების კურსი, რომელიც მიზნად ისახავს სტუდენტებში ფორმალური და არფორმალური განათლების განვითარებას, რაც თანამედროვე, გლობალურ სივრცეში სამოქალაქო ინტეგრაციისთვის საკმაოდ მნიშვნელოვანია. სტუდენტებს ვთავაზობთ აქტუალურ, საინტერესო თემატიკას სხვადასხვა სფეროდან. ჩვენი პირველი საჯარო ლექციაც სწორედ სიმბლურად შეეხებოდა “წარმატების მიღწევის ფსიქოლოგიას”. წარმატება ხომ ასე სასურველია ახალგაზრდობისთვის.
ნოდარ ვაწაძე – თვითმმართველობის პრეზიდენტი: – ჩვენს მიერ გამართული საჯარო ლექციები ემსახურება სტუდენტების ცოდნის ამაღლებას და გაღრმავებას და ჩვენ ვიმედოვნებთ, რომ ისინი ამ ლექციების მოსმენის შემდეგ შეეცდებიან რეალიზაციაში მოიყვანონ ეს ყოველივე. მსგავსი ლექციები აქტუალური იქნება სტუდენტებში თუ ჩვენ მათ დავაინტერესებთ რაიმე მათთვის საინტერესო თემებით და აქტუალური საკითხებით ამავდროულად უნდა იყოს მათთვის წამახალისებელი საშუალება, რაც ჩვენგან სერთიფიკატის გადაცემა იქნება, იმ შემთხვევაში თუ 10 ლექციიდან, 8-ს დაესწრებიან.
09.11.13
გიორგი ჩუბინიძე
