ყველა ბიზნესს საკუთარი ისტორია აქვს. ამასთანავე, მიზეზები და მიზნები, რის გამოც ის არსებობს. „ცისარტყელა baby” საბავშვო პროდუქციას ქმნის, რომლის ხარისხიც ბრენდს მოთხოვნადს ხდის.
მისი დამფუძნებელი ამ მხრივ თვითნასწავლია. საინტერესო აღმოჩნდა მეთოდი, რომელიც მან ცოდნის შესაძენად გამოიყენა. სულ მალე კი, ბიზნესმა წარმატებებს მიაღწია, რაც მომხმარებლის რაოდენობაში აისახა.
ეთო ლომიძე, საბავშვო ბრენდ „ცისარტყელა baby’’-ის, დამფუძნებელი, იდეის ავტორი და შემსრულებელი “თბილისი თაიმსს” ესაუბრა.
შესაბამისი ცოდნა როგორ მიიღეთ?
ვარ თვითნასწავლი. ხელსაქმე ყოველთვის იყო ჩემი ჰობი. ბავშვობიდანვე თავისუფალ დროს ვუთმობდი კერვასა და სხვადასხვა ნივთის შექმნას. დროთა განმავლობაში ჰობი გადაიქცა ბიზნეს იდეად, პროფესიად და შემოსავლის წყაროდ. საწყის ეტაპზე, მეხმარებოდა ვიდეოგაკვეთილები ინტერნეტსივრციდან.
“ცისარტყელა baby” უკვე 4 წელია, რაც ქართულ ბაზარზეა და აერთიანებს, განსხვავებულ საბავშვო პროდუქციას, რომელიც განსაზღვრულია სხვადასხვა ასაკის ბავშვებისათვის.
დეტალურად რომ გვითხრათ, რას ამზადებთ?
ჩვილებისათვის ვამზადებთ: წინსაფრებს, პირსაწმენდებს, საწოვარის საკიდებს სახელებით, რბილ სათამაშოებსა და საბავშვო ბუდეებს, საბავშვო საწოლის თეთრეულსა და სხვადასხვა აქსესუარს. ასევე, ჩვილებისთვის იქმნება ნაქსოვი პროდუქცია; როგორიცაა, საბავშვო ფაჩუჩები, ქუდები და ნაქსოვი სათამაშოები. ხისგან ვამზადებთ ღრძილების მასაჟორს და ხმოვან სათამაშოებს, არ ვიყენებთ არანაირ საღებავს და ლაქს. მოზრდილი ასაკისთვის ვამზადებთ საბავშვო კარვებს. ჩვენი კარვები ძალიან დიდ მოწონებას იმსახურებს, რადგან ის ძალიან კომფორტული და მყუდრო სათამაშო სივრცეა ბავშვებისათვის. ასევე, ვამზადებთ განმავითარებელ რბილ სათამაშოებსა და წიგნებს. ხის პერსონალურ ფაზლებს ყველა ასაკის ბავშვისა და ზრდასრული ადამიანისათვის.
წარმოების გაფართოებას თუ გეგმავთ?
ჩემს სამომავლო გეგმებში შედის ბიზნესის გაფართოება და განვითარება. ვაპირებ, დავამატო საბავშვო ტანსაცმლის ხაზი, ამ მიზნის მისაღწევად მთავარი საფუძველი უკვე ჩაყრილია, რადგან 2020/2021 წლებში შევისწავლე ტანსაცმლის კონსტრუირება და კერვა კოლეჯ ‘’მერმისში’’.
მომავალში ვაპირებ, შევასწავლო მსურველებს კერვა, რომლებსაც შემდგომ დავასაქმებ კიდეც და დამეხმარებიან წარმოების გაზრდაში.
რა არის თქვენი პრიორიტეტი საქმიანობის დროს?
ამ ეტაპზე, ჩემი მთავარი პრიორიტეტია ხარისხი და კმაყოფილი მომხმარებელი. პროდუქცია იქმნება 100%-ით ბამბის ქსოვილისა და ანტიალერგიული მასალისაგან. ყველა მასალა, რასაც ვიყენებ, არის ნატურალური და სრულიად უსაფრთხო ბავშვებისათვის.
მასალა მოამზადა : მარიამ ტიელიძემ
