ბუნებასთან მაქსიმალური სიახლოვე, შეიძლება ითქვას, დღეს ადამიანისთვის ერთერთ მთავარ მოთხოვნილებას წარმოადგენს. სამზარეულო, საინტერესო კერძები და მყუდრო გარემო ის მოცემულობებია, რაც განტვირთვისთვის იდეალურ საშუალებას გვაძლევს. ამ ყველაფრის გათვალისწინებით, გაჩნდა იდეა – ველურ ბუნებაში მომზადებულიყო გემრიელი საჭმელები.
Geo Wild Kitchen-ის დამფუძნებელია არჩილ გლურჯიძე. საკუთარი საქმიანობის, იდეებისა და სამომავლო გეგმების შესახებ, ის “თბილისი თაიმსს” ესაუბრა.
“ეს საქმიანობა რამდენიმე წლის წინ დავიწყე, გამომდინარე იქიდან, რომ მიყვარს საჭმელების კეთება და მაქვს მეორე პროფესია – გახლავართ ოპერატორიც. ეს ორი საქმიანობა დავუკავშირე ერთმანეთს და გავაკეთე ვიდეოვლოგი ველურ ბუნებაში. ცოტახანში, გამოჩნდა სოციალური მედია, რომელმაც დამიკვეთა, გარკვეული პერიოდით, ვიდეოების დადება. იმის გამო, რომ ყველაფერს რესურსი ეწურება, გადავწყვიტე, ეს ღია სამზარეულო ერთ ადგილზე დამემკვიდრებინა და ავირჩიე კონკრეტული სივრცე, სადაც, სამზარეულოსთან ერთად, გავაკეთებ რეკრეაციულ ზონას. აქ განთავსდება კოტეჯები ან მსგავსი შენობა-ნაგებობები, რაც ხელს შეუწყობს გართობას, დასვენებას. მინდა, გავაკეთო მულტიფუნქციური სივრცე”, – ამბობს არჩილი და ხაზს უსვამს, თუ რას შესთავაზებს ის მომხმარებლებს.
“იქნება კემპინგ პარკი, სადაც, მაგალითად, ტურისტებს უფასო კარვებით ვუმასპინძლებთ. ასევე, ცალკე კუთხე ბავშვების გასართობად. გვინდა წყლის ათვისებასაც. თავიდან, სავარაუდოდ, მხოლოდ ველოსიპედები გვექნება, მაგრამ მომავალში ბევრი გეგმა გვაქვს, გარდა ამისა, უკვე შემდგომ მინდა, რომ კვებაც იყოს უზრუნველყოფილი. თავდაპირველად, ეს ვერ იქნება შესაძლებელი, კონკრეტულად კოტეჯში დამსვენებლებისთვის. მაგრამ ღია სამზარეულოზე ვუმასპინძლებ ხოლმე იქ ჩამოსულ სტუმრებს.
სასიამოვნოდ დასვენებას ყველა ადამიანი შეძლებს. მათ შორის, ვისაც არ ექნება იმის საშუალება, რომ ამაში თანხა გადაიხადოს – მათ, ვისაც არ აქვს მსგავსი გამოცდილება, შევთავაზებ კარვით უფასო სივრცეს. ის აქ შეძლებს ერთი ან ორი ღამის გატარებას”, – ამბობს არჩილ გლურჯიძე “თბილისი თაიმსთან” საუბრისას.
