„თაია“ – ეს გახლავთ სამყარო ადამიანებისთვის, რომელთათვისაც ძალიან მნიშვნელოვანია სილამაზე, წესრიგი და გამორჩეული დიზაინი. ბრენდი ქმნის ნამუშევრებს, რომლებიც გვაძლევს საშუალებას, მარადიული გავხადოთ ის წამი თუ ემოცია, რომელიც ჩვენთვის მნიშვნელოვანია. თამუნა იანვარაშვილი „თბილისი თაიმსს“ საკუთარი საქმიანობის შესახებ უყვება.
ჩვენი ისტორია საქართველოს ბაზარზე თითქმის ორ წელს ითვლის. მას შემდეგ „თაია“ მუდამ ცდილობს, განვითარდეს და თავისი წვლილი შეიტანოს მინიატურული კულტურის განვითარება-გავრცელებაში.
ამ ეტაპზე, რას ამზადებთ?
„თაია“ არის ემოციები, რომელსაც ხელით ეხებით, უფრო კონკრეტულად – თქვენი საყვარელი სახლის, ადგილის, ნივთის ზუსტი ასლი რეალობაში გადმოტანილი, ანდა წარმოსახვით შექმნილი სამყარო.
მაქსიმალურად ვცდილობთ ჩვენი მომხმარებლის საჭიროებების, იდეების გათვალისწინებას და მათზე მორგებული პროდუქტის შეთავაზებას. მიმდინარეობას, რომელსაც მივსდევ, ჰქვია – დიორამა, სამგანზომილებიანი სცენა, რომელსაც ბევრი დანიშნულება აქვს. მაგ: შესაძლებელია მისი გამოყენება საგანმანათლებლო მიზნებისთვის, ამ მეთოდის გამოყენება ხელს უწყობს ბავშვისთვის ტექსტის გაგება-გააზრებას, დეტალების დამახსოვრებას, ანუ მაქსიმალურად ვიზუალურად აღიქვამენ წაკითხულს. დიორამას ასევე ხშირად შეხვდებით მუზეუმებშიც.
აშკარად გამორჩეული დიზაინის არის თქვენი დღიურები – რა არის ის ძირითადი ხაზი, იდეა, რაც თითოეულ მათგანს აერთიანებს
დღიურის იდეა მთლიანად მინიატურულ სტილზე ავაწყე, არ მინდოდა, დამეკარგა ჩემი ნიშა. ამიტომ, ვეცადე – ყდა მექცია გამორჩეულ დიზაინად. ფასადი ავარჩიე და დავიტანე წიგნაკის ყდაზე. საკმაოდ ბევრი გამოხმაურება აქვს, ვაპირებ ამ პროდუქტის კიდევ დამზადებას, ვფიქრობ – ექსპერიმენტები მუდამ საჭიროა.
ახალი პროდუქტის დამატებას თუ გეგმავთ?
ჯერჯერობით, ახალ პროდუქტად წიგნაკი შეიძლება – ჩაითვალოს, ამიტომ, ვფიქრობ კიდევ რამდენიმე დიზაინის დამზადებას. „თაია“ მუდამ სიახლეებთან კავშირშია. მუდმივად ვცდილობთ, განვვითარდეთ, დავხვეწოთ სამუშაო ტექნიკები, მივიღოთ მონაწილეობა სხვადასხვა პროექტში და მაქსიმალურად გავაცნოთ ხალხს სფერო, რომელიც უსაზღვროდ საინტერესო, მნიშვნელოვანი და შემეცნებითია.
