ადამიანებს ბუნებრივად გვაქვს მიდრეკილება, შევიძინოთ და გამოვიყენოთ ხარისხიანი პროდუქცია. ეს განსაკუთრებით მაშინ, როდესაც საქმე ჯანმრთელობასა და თავის მოვლას ეხება. „ბებო კარლა“ გახლავთ საქმიანობა, რომელიც საკუთარ მომხმარებელს გამოცდილებასა და ცოდნაზე დაფუძნებულ ნაწარმს სთავაზობს. ნინო ჯანიაშვილი საკუთარი ლოკოკინების ფერმა აქვს. შედეგად, ის ამზადებს პროდუქციას, რომელიც უნიკალური თვისებებით ხასიათდება. დეტალურად, „თბილისი თაიმსს“ ნია თავად ესაუბრა.
თავდაპირველად, რომ გვითხრათ – რას ამზადებთ?
ჩემს ამჟამინდელ საქმიანობაზე რომ მოგიყვეთ, ცოტა შორიდან მომიწევს დაწყება, ვეცადე, ცხოველებისადმი ჩემი დიდი სიყვარული და დედაჩემის წლების ნაგროვი ცოდნა და გამოცდილება გამეერთიანებინა. ლოკოკინების ფერმა მაქვს, ეს გახლავთ სპეციალური ჯიში, რომელსაც მოიხმარენ სამკურნალოდ და კოსმეტიკურ პროდუქციაში. უკვე ჩემი ყოველდღიური რუტინა მათ გარეშე წარმოუდგენელია, ვაგროვებ მათ ლორწოს, რომელიც უნიკალური თვისებებით გამოირჩევა. ლოკოკინის ლორწოს რეგენერაციის უნარი აქვს, საუკეთესოა აკნეს დამწვრობისა თუ შრამების გასაუფერულებლად, ამიტომ ვიფიქრე, რომ ამ სიკეთით მხოლოდ მე არ უნდა მესარგებლა, ეს იყო მთავარი მიზანი. ჩავიფიქრე და დიდი შრომის, ბევრი მუშაობის შემდეგ მივაღწიე დასახულ მიზანს. შევქმენი პროდუქტები, კერძოდ: სხვადასხვა ფორმის და ფერის ულამაზესი საპნები და მკვებავი კრემები, რომელიც გახლავთ ლოკოკინის ლორწოთი დატვირთული.
როგორ შეაფასებთ – რით არის თქვენი პროდუქცია გამორჩეული?
როგორც ვახსენე, დედის საქმიანობა ჩემთვის დიდი სტიმულის მომცემი გახდა, ის ამჟამადაც ცდილობს – გააგრძელოს თავისი მკვებავი კრემების დამზადება ჩემი დახმარებით. დედა, სამწუხაროდ, მძიმე სენს ებრძვის. ის ონკო პაციენტია და ვეცადე – ამ ჩემი წამოწყებით მისთვის სტიმული მიმეცა. დედას კრემები უფრო გამორჩეული რომ ყოფილიყო, დავუმატეთ ლოკოკინის ლორწო, რამაც კიდევ უფრო მეტი სამკურნალო თვისებები შესძინა. პარალელურად, დავიწყე სწავლა მცენარეების, მათი სასარგებლო თვისებების, ვისწავლე ეთერზეთების მომზადება, ვეცნობოდი ყველა სასარგებლო პროდუქტს. რადგან თვითნასწავლი ვარ, ყველაფერს ძალიან დეტალურად და განსაკუთრებული ყურადღებით ვუდგები, რადგან ორმაგ საპასუხისმგებლოს ვგრძნობ, შესაბამისად, ძირეულად ვუღრმავდები ყველა დეტალს.
შემიძლია, თამამად ვთქვა, რომ ჩემი საპნებისა და მკვებავი კრემების უნიკალურობა მათ ბუნებრივობასა და თვისებებშია. არ მინდოდა, შემექმნა უბრალოდ საპონი, რომელიც მხოლოდ ბუშტებს დაგვიგროვებდა ხელებზე.
საქმიანობის ფარგლებში, რა აქტივობებით ხართ დაკავებული?
როცა აღმოვაჩინე, რომ ჩემი პროდუქცია უამრავ ადამიანს მოსწონს, გაჩნდა დაინტერესებაც. ჩემი მიზანი ხომ პირველ რიგში დედისთვის სტიმულის მიცემა იყო. ამასთან, გამოჩნდა უამრავი კეთილი ადამიანი, რომლებმაც მომცეს შანსი – პროდუქცია უფრო ფართო მასებისთვის გამეცნო. მქონდა და დღემდე მაქვს ბევრი შემოთავაზება გამოფენებიდან, ვიღებ მონაწილეობას და ვაცნობ საზოგადოებას ჩემს შექმნილ პროდუქტს. ეს კოლაბორაცია ძალიან საინტერესო და კიდევ უფრო წახალისება აღმოჩნდა ჩემთვის. ვცდილობ, ჩემი შექმნილი პროდუქტი სასარგებლოსთან ერთად საინტერესოც იყოს, ჩემი უცნაურობები არავის უკვირს, ვცდილობ, ყველა საქმიანობა, რასაც ხელს ვკიდებ, სანახაობასაც მოიცავდეს, ამიტომ, ყველა გამოფენაზე ჩემი ლოკოკინებით მივდივარ, აღნიშნული კი ხალხში აღფრთოვანებას იწვევს, სურათებს იღებენ, მე კი გაუჩერებლად და დიდი ენთუზიასმით ვსაუბრობ მათზე, მათ მოვლის წესებსა და, რა თქმა უნდა, ჩემს პროდუქციაზე.
გარდა საპნების მზადებისა, რას საქმიანობთ?
ხელოვნებისადმი ჩემი სიყვარული ღრმა ბავშვობიდან მოდის. დავიწყე ნაქარგებით, დავამატე ქსოვა, კერვა. მამა პროფესიით მხატვარია და მეც ბავშვობიდან ვხატავ, ასევე, ჩემი დიდი გატაცება მეთოჯინეობა გახლავთ. ყველა ამ ჩემი საქმიანობის რეალიზებას ვახდენ წლებია, ამჟამად, დამატებული მაქვს ათასამდე ლოკოკინის მოვლა და ახალი წამოწყება ამ საპნებით და კრემებით. ერთადერთი, რაც სირთულეს მიქმნის, ეს დროა, მისი ნაკლებობა, შრომა არ მეზარება და ვცდილობ, ყველაფერს გავუმკლავდე, ჩემი სამი შვილის აღზრდასთან ერთად. მინდა აღვნიშნო, რომ არა მეუღლის გვერდში დგომა, მხარდაჭერა – ამდენს ვერ შევძლებდი, ის ჩემთვის დიდი სტიმულის მომცემია და არასდროს მაძლევს უფლებას, დავნებდე სირთულეებს.
და ბოლოს, საინტერესოა – რატომ „ბებო კარლა“?
ეს ყველაფერი უბრალო ხუმრობით დაიწყო, სახელიც სპონტანურად დამერქვა მეგობრებისგან, ჩემი ამდენი საქმიანობა და ხელოვნებისადმი მიდრეკილება გახდა მათთვის ამ სახელის ინსპირაცია, თუმცა სახელი – „ბებო კარლა“ შემდგომ უფრო გავამყარე ამ ჩემი ახალი საქმით, შემიძლია ვთქვა, რომ ლოკოლინების დაახლოებით ხუთ თაობას ვზრდი და უამრავი შვილიშვილის ბებო გავხდი.