ბიზნესის, საყვარელი საქმიანობის წამოსაწყებად ადამიანებს აქვთ არაერთი მიზეზი, ასევე – მიზანი, რის გამოც ამ ნაბიჯს დგამენ. სხვადასხვა შემთხვევაში, განსხვავებულია ისტორია, რომელიც ამა თუ იმ წამოწყებას უდევს საფუძვლად. “ბებოსია” სამი მეწარმე ქალის მიერ დაარსებული ბიზნესია.
ნინო დოლიძემ, სოფიო გორგილაძემ და მირანდა გორგილაძემ მიიღეს გადაწყვეტილება, ჰქონოდათ საკუთარი წარმოება და ეკეთებინათ საქმე, რომელიც მათთვის საინტერესოა. “თბილისი თაიმსს” ნინო დოლიძე ესაუბრა.
ოფიციალურად, “ბებოსია” 2019 წელს დაარსდა. ამავე წელსვე დავიწყეთ საწარმოს მშენებლობა. უკვე მესამე წელია, რაც ადგილობრივ ბაზარზე ვოპერირებთ. ვართ აჭარაში, კონკრეტულად – ქობულეთის მუნიციპალიტეტში, სოფელ სახალვაშოში.
რას აწარმოებთ?
საწარმო, ძირითადად, ემსახურება საკონსერვო ნაწარმს. ეს არის ტყემლის ნაირსახეობები, ტომატ-სოუსები, ნატურალური წვენები… ახლა ვიწყებთ მურაბებისა და ჯემების წარმოებას და გვაქვს აჯიკის ნაირსახეობა.
რით არის თქვენი პროდუქტი გამორჩეული?
ვფიქრობ, რომ გამოვირჩევით ჩვენი ნიშით, რაც ემსახურება განსაკუთრებულ, ბებოსეულ გემოებსა და რეცეპტებს, რაც აჭარელ ქალბატონებს ახასიათებთ. ეს არის ოჯახებში ნარჩევი რეცეპტურა. პირველი რეცეპტი წამოვიდა ოჯახიდან და ის იყო ბებიაჩემის. ყველა პროდუქტი სრულიად განსხვავებული გემოსია.
ბრენდირების შესახებ რას გვეტყვით – საიდან გაჩნდა იდეა?
ბრენდირებაც გვაქვს ძალიან განსხვავებული და განსაკუთრებული. ბევრი ფიქრის შემდეგ, საბოლოოდ, შევჯერდით ბებოს კონტურულ სახეზე, რომელიც ასევე ბებიაჩემის გამოსახულებაა. გადავწყვიტეთ, ეტიკეტის ფონად შავი, სოლიდური ფერი შეგვერჩია, დღეს უკვე, სხვა ტყემლებისა და კონსერვების ბრენდებთან მიმართებით, როდესაც ჩვენი ნაწარმიც მათთან ერთად დევს, ადვილად გასარჩევია ორიგინალური, სოლიდური ვიზუალიდან გამომდინარე. ჩვენი ნაკრებები უკვე ისე გამოიყურება, რომ ადამიანები გვწერენ და გვირეკავან, რათა შეუკვეთონ, როგორც სასაჩუქრე ნაკრებები, რადგან ის არ გამოიყურება, როგორც ჩვეულებრივი ტყემალი. ეს ჩვენ ძალიან გვეამაყება.
საქართველოს სრულად მოიცავთ?
ჯერჯერობით, იქედან გამომდინარე, რომ ჩვენი საწარმო არ არის ძალიან დიდი, არ გვაქვს იმის ფუფუნება, რომ მთელი საქართველოს ქსელური მარკეტები მოვიცვათ, თუმცა, სრულად გვაქვს ათვისებული აჭარა. ახლა უკვე მოლაპარაკებებს ვაწარმოებთ და ექსპორტზე გავალთ ისრაელში, თურქეთში, ბალტიისპირეთსა და აშშ-ში, რადგან წელს, თანადაფინანსებების ხარჯზე, წარმადობას ვზრდით. როგორც ახალგაზრდა ქალ მეწარმეებს, ძალიან გვიწყობენ ხელს, რომ განვავითაროთ ჩვენი ბიზნესი.
რა აქტივობებით ხართ დაკავებული?
ვმონაწილეობთ ძალიან ბევრ გამოფენაში, ვეცნობით ადამიანებს და ვართ ძალიან აქტიურები. ჩვენ ვართ სხვადასხვა პროფესიის წარმომადგენლები და “ბებოსია” არ არის ჩვენი ერთადერთი საქმიანობა. ბიზნესსაქმიანობის წამოსაწყებად იდეალური გუნდი შევიკრიბეთ.
ხაზი უნდა გავუსვა, რუსეთის ბაზარზე ძალიან დიდი მოთხოვნა იყო, ჩვენი პროდუქტი გაყიდულიყო და შემოსავალიც კარგი გვქონოდა. თუმცა, იმის გამო, რომ არ ვეთანხმებით მის პოლიტიკას, ყოველგვარ კავშირზე უარი ვთქვით. “ბებოსიამ” გადაწყვიტა, რომ რუსეთის ბაზარზე თქვას უარი და სხვა ბაზრები ავითვისოთ, თუმცა – მცირე შემოსავლით, მაგრამ ვიქნებით ამაყები. ვფიქრობ, მოკლე დროში შევძელით, რომ ხალხმა შეგვიყვარა და ჩვენ შევქმენით მოთხოვნადი პროდუქცია.
