ხელოვანისთვის ნამუშევრის შექმნის პროცესი ძალიან სასიამოვნოა. ამ დროს მათი სამყარო განსაკუთრებით ფერადდება და იდეებიც თავისთავად მოდის. დარეჯან მერლანი საოცარ სილამაზეებს ცოცხალი ყვავილების მეშვეობით ქმნის. სხვა არაერთი საქმიანობის მსგავსად, მისი ბიზნესიც პანდემიის პერიოდში დაიბადა. დეტალებზე ხელოვანი „თბილისი თაიმსს“ ესაუბრა.
ვქმნი ხელნაკეთ აქსესუარებს, რომლებიც დამზადებულია საიუველირო ეპოქსიდისგან, ცოცხალი ყვავილებით და სხვადასხვა დეკორაციით, რაც უფრო კრეატიულს ხდის ნივთებს. სწორედ ამაშია მათი ორიგინალობა, რომ ზუსტი ანალოგის დამზადება შეუძლებელია, ასევე, მორგებულია დამკვეთის სურვილზე.
ეს საქმიანობა დავიწყე პანდემიის პერიოდში და უცბად აიტაცა ხალხმა, რისთვისაც მადლობას ვუხდი ჩემს თითოეულ დამკვეთს თუ გამომწერს. მეც არასდროს ვჩერდები ერთ კონკრეტულ მიმართულებაზე და ვცდილობ, ყოველ ჯერზე მეტი და მეტი სიახლე შევთავაზო მომხმარებელს.
როგორც დარეჯანი გვიყვება, საკუთარმა მხატვრულმა ნიჭმა და ბუნების სიყვარულმა საქმიანობა ძალიან გაუადვილა.
იდეას რაც შეეხება, ის გაჩნდა მაშინ, როდესაც მეც მაჩუქეს მსგავსი აქსესუარი და იმდენად მომეწონა, დამებადა კითხვა – რატომაც არაა? ვცდიი..! და დარწმუნებული ვიყავი, რომ გამომივიდოდა, რაშიც ხელს შემიწყობდა ჩემი მხატვრული ნიჭი, სიყვარული ყვავილების და ბუნების მიმართ.
რესპონდენტის თქმით, ბუნებაში სიარული და მინდვრის ყვავილების შეგროვება მისთვის სასიამოვნო პროცესია.
ძალიან სასიამოვნო პროცესია, დავდივარ ბუნებაში და ვაგროვებ მინდვრის ყვავილებს, ფოთლებს… ყველა მათგანს სიცოცხლის საშუალება ეძლევა და მუდამ ინარჩუნებენ იმ იერსახეს, როგორიც იყო. საზოგადოების ინტერესიც საკმაოდ დიდია და მიხარია, რომ ხელნაკეთ ნივთებს ასე აფასებს ხალხი და მუშაობის მოტივაციაც არ იკლებს. მათი წყალობით მივიწევ წინ. სხვა ნივთებს რაც შეეხება, რა თქმა უნდა, ვგეგმავ. მინდა, გადავიდე უფრო დიდი ზომის ნივთებზე. ამ ეტაპზე, გეგმაში მაქვს კედლის საათები და დეკორი ინტერიერისთვის.
