თითოეული ჩვენგანი ბავშვობის წლების გარკვეულ ეტაპზე ალბათ აუცილებლად ყოფილა რაიმე ხელსაქმით დაკავებული. ბევრისთვის ეს პერიოდი დროის საინტერესოდ გაყვანისა და ელემენტარული უნარების შეძენის შესაძლებლობად დარჩა, სხვებისთვის კი ცხოვრების განუყოფელ ნაწილად იქცა.
მაიკო მჭედლიშვილისთვის გამორჩეულად საყვარელ ხელსაქმედ ქარგვა იქცა. დიდი ხანი არ არის, რაც ამ მიმართულებით არის დაკავებული. დეტალები თავად შეისწავლა და დღეს უკვე პროფესიონალურ ნაქარგებს ქმნის. ის „თბილისი თაიმსს“ ესაუბრა, კონკრეტულად, რას საქმიანობს და როგორ ქმნის საკუთარ ნამუშევრებს.
ვქარგავ მხატვრობის სხვადასხვა მიმდინარეობის წარმომადგენელთა ნამუშევრების ასლებს. ძირითადად, ვქარგავ ჯვარედინი ქარგვის ტექნიკით. ნამუშევრების შესაქმნელად მჭირდება, პირველ ყოვლისა, სქემა, რის მიხედვითაც გადამაქვს კომპოზიცია ნაჭერზე. ამისათვის საჭიროა კანვა და მაღალი ხარისხის საქარგი ძაფები. ზოგჯერ ბისერებსაც ვამატებ, რომ კომპოზიცია უფრო მრავალფეროვანი და საინტერესო გამოვიდეს.
როგორც ხელოვანი აღნიშნავს, მისი ნამუშევრების დიდ ნაწილს აერთიანებს ერთი თემატიკა – ბუნების მიმართ მისი სიყვარული. უმეტესაც, მაიკოს ნაქარგებში ცხოველების გამოსახულებებს შენიშნავთ.
ზოგადად, მიყვარს ბუნება. ამიტომ, ძირითადად ვქარგავ ნატურმორტს, პეიზაჟებს და ზოგჯერ პორტრეტებსაც. ასევე, ძალიან მიყვარს ცხოველებიც და მათი გამოსახულებები ხშირად შეგხვდებათ ჩემს ნამუშევრებში.
მაიკო მჭედლიშვილის თქმით, ის თვითნასწავლია. ქარგვით 4 წლის წინ დაინტერესდა, ნელ-ნელა ნამუშევრები დახვეწა და დღეს უკვე საკუთარ შვილთან ერთად ქარგავს.
თვითნასწავლი ვარ. 4 წლის წინ დავინტერესდი ამ ხელსაქმით და მას შემდეგ თავდაუზოგავად ვქარგავ. თავიდან ქარგვა დავიწყე შეცდომებით, თუმცა, ძალიან მოვინდომე და ამ შეცდომებზე ნელ-ნელა ბევრი რამ შევისწავლე. ახლა ჩემს შვილსაც ვასწავლე და ერთად ვქარგავთ. ძალიან მაინტერესებს წყლით და ლენტებით ქარგვაც და ახლო მომავალში მინდა შესწავლაც, ასევე, ბისერებით ქარგვის დახვეწა (თუ მომეცემა ამის დრო და საშუალება). ძალიან მიყვარს ხატვა და თუ თავისუფალი დრო გამომიჩნდება, ვხატავ კიდეც, თუმცა ვფიქრობ, რომ ქარგვა უფრო კარგად გამომდის და ამიტომ მისკენ უფრო ვიხრები.
