ცოტა ხნის წინ ჰიუ გრანტს 63 წელი შეუსრულდა. მსახიობმა, რომელიც მთელ მსოფლიოში ბრიჯიტ ჯონსის მეგობარი მამაკაცის როლით გახდა ცნობილი, მოგვიანებით რომანტიკულ კომედიებში მონაწილეობაზე უარი თქვა.
თუმცა, 90-იან წლებში იგი ერთ-ერთი ყველაზე მოთხოვნადი არტისტი იყო. მას შესანიშნავი იუმორი ჰქონდა, შეეძლო, ბევრი განსხვავებული გმირი შეექმნა და მაყურებლისთვის ღიმილი ეჩუქებინა.
“დავბერდი, საშინლად გამოვიყურები და მსუქანი ვარ იმისათვის, რომ რომანტიკულ კომედიებში ვითამაშო. ამიტომ, ახლა სხვა საქმეს ვაკეთებ და საკუთარი თავიც ნაკლებად მძულს.” – თქვა ერთხელ გრანტმა.
2018 წელს მსახიობი ტრიუმფალურად დაბრუნდა. ფილმში “წმინდა ინგლისური სკანდალი” გეი პოლიტიკოსის როლი შეასრულა. აღნიშნული როლის გამო გრანტი ოქროს გლობუსის, ემისა და BAFTA-ს ჯილდოებზე იყო ნომინირებული. მიუხედავად იმისა, რომ ჯილდო არ მიუღია, მან კრიტიკოსები კიდევ ერთხელ დაარწმუნა, რომ კარგად თამაში რომანტიკული კომედიების გარდა, სხვა ჟანრში შეეძლო.
მისი კიდევ ერთი მნიშვნელოვანი ნამუშევარი გაი რიჩის ფილმში “ჯენტლმენი” შესრულებული როლი აღმოჩნდა. მოგვიანებით ჰიუ გრანტმა თქვა, რომ რეჟისორთან მუშაობა რთული იყო, მაგრამ ღირდა. აღნიშნა ისიც, რომ გაი რიჩმა მოულოდნელად სცენარი შეცვალა და გადაღებების წინ დიდი ტექსტის დამახსოვრება უწევდა.
მსახიობი ჟურნალისტებთან ურთიერთობას უკვე მრავალი წელია, გაურბის. 2000-იანი წლების ბოლოს ჰიუ გრანტმა გაარკვია, რომ ერთ-ერთი ბრიტანული გამოცემა არა მხოლოდ უთვალთვალებდა, არამედ მის ტელეფონსაც უსმენდა. მსახიობი ასევე ამტკიცებდა, რომ რედაქციის მითითებით მის ბინაში უცნობი პირები შევიდნენ. დავა News of the World-ის წინააღმდეგ 2011 წელს დაიწყო. პროცესი რამდენიმე წლის განმავლობაში გრძელდებოდა, 2018 წელს კი მისი გამარჯვებით დასრულდა. ჰიუ გრანტმა ისიც აღნიშნა, რომ პრესის გადამეტებული ყურადღებისა და დევნის გამო, დეპრესია დაემართა და ნერვული აშლილობის პიკზე იყო.
მსახიობი დიდი ხნის განმავლობაში არ ქორწინდებოდა. დღეს გრანტს 5 შვილი ჰყავს: 2 შვილი – ჩინელი მსახიობისაგან, ტინგლან ჰონგისაგან, სამი კი – შვედი პროდიუსერისაგან, ანა ებერშტეინისაგან. 2018 წელს ებერშტეინზე იგი ოფიციალურად დაქორწინდა.
“დაქორწინება მრავალი წლის განმავლობაში გადავდე, რადგანაც ვფიქრობდი, რომ ეს თავისუფლებას წამართმევდა. აღმოჩნდა, რომ ძალიან ვცდებოდი.” – თქვა მსახიობმა. ის ახლა კვლავ აგრძელებს სხვადასხვა პროექტში მონაწილეობას და დროს შვილებსა და ოჯახსაც უთმობს
