ჩემთვის გაუგებარია, რა არგუმენტი შეიძლება დასახელდეს, რატომ შეიძლება ჩვენი ოჯახური ღირებულებები უშლიდეს ხელს ევროპაში გაერთიანების პროცესს, – განაცხადა საქართველოს პარლამენტის თავმჯდომარის მოადგილემ ნინო წილოსანმა გადაცემაში „დღის ქრონიკა“, რითაც გამოეხმაურა გამჭვირვალობისა და ლგბტ-კანონების გაწვევის მოთხოვნას დასავლეთის მხრიდან.
„ჯერ ჩვენ უნდა აგვიხსნან, რომ ამ ქვეყნის ოჯახური ღირებულებები როგორ მოდის წინააღმდეგობაში ევროკავშირთან და ჩვენი ოჯახები როგორ ან რატომ უპირისპირდება ევროპულ იდეას, რადგან ნებისმიერი საღად მოაზროვნე ადამიანისთვის გაუგებარია, რას უშავებს ჩვენი ოჯახები ევროპის იდეას და რატომ არის ეს მოთხოვნა ასეთი გადამწყვეტი და საკვანძო.
წარმოუდგენელია, რატომ შეიძლება შენი პარტნიორი გესაუბრებოდეს ასეთი ულტიმატუმების ენით, როდესაც ერთ მხარეს დგას სტანდარტებისა და ნორმების შესაბამისობაში მიყვანა. ჩვენ უამრავი საკანონმდებლო თუ კანონქვემდებარე აქტი მოვიყვანეთ წესრიგში იმისთვის, რომ დავახლოებოდით ევროკავშირის პრინციპებსა და სტანდარტებს, მაგრამ მეორეა, როდესაც მოთხოვნაა, რომ საკუთარ იდენტობაზე ან საკუთარი ქვეყნის მოწყობის პრინციპზე გათქმევინონ უარი, გათქმევინონ უარი იმ ტრადიციებზე, იმ ფუნდამენტზე, რითაც ჩვენი ქვეყანა აქამდე მოსულა. რატომ არის ეს ყველაფერი აუცილებელი იმისთვის, რომ ამ მნიშვნელოვან და საინტერესო ოჯახში მიგიღონ“, – აღნიშნა ნინო წილოსანმა.
მისივე თქმით, ევროპა არის უამრავი ქვეყნის გაერთიანება, რომელსაც აქვს თავისი ტრადიციები, ისტორია, თავისი მრავალფეროვნება და სწორედაც ეს მრავალფეროვნება და იმ ისტორიისა და ტრადიციების დაფასება იყო ამოსავალი წერტილი, რატომაც საქართველო ევროკავშირში გაერთიანების იდეამ მოხიბლა.
„სრულებით გაუგებარია, რატომ შეიძლება გამჭვირვალობის კანონი, რომელიც არის ძალიან რბილი, რომელიც ძალიან მარტივ პრინციპებს მოიცავს და არაფერს აშავებს, რომელიც აქამდე მუშაობს და საფრთხე არ შეუქმნია არცერთი „ენჯეოს“ წარმომადგენლისთვის, რომელიც გაცილებით მძიმე და მკაცრი ფორმებით მუშაობს დასავლეთის სხვადასხვა ქვეყანაში, რატომ უნდა იყოს წინააღმდეგობაში ევროკავშირში გაწევრიანების პროცესთან?!
„ქართული ოცნება“ ძალიან სამართლიანად მოიქცა როგორც საკუთარი ამომრჩევლის, ისე პარტნიორების მიმართ. ჩვენ არჩევნებამდე დავაანონსეთ და გავაცხადეთ ის პრინციპები, რომელ პოლიტიკასაც ჩვენ გავატარებდით და შესაბამისად, ამ პრინციპებს დაუჭირა მხარი ქართველი ამომრჩევლის აბსოლუტურმა უმრავლესობამ. სწორედ ეს პრინციპები და ღირებულებები იყო რატომაც ქუდზე კაცი დაირაზმა და არჩევნებზე მოვიდა“, – აღნიშნა ნინო წილოსანმა.
