ქართველი ჟურნალისტის, თამუნა მუსერიძის სახელი ბოლო წლების ერთ-ერთ ყველაზე მტკივნეულ და მასშტაბურ პრობლემასთან – უკანონო გაშვილებასთან და ბავშვებით ვაჭრობის სისტემასთან ასოცირდება. 2016 წელს, მას შემდეგ, რაც მუსერიძემ საკუთარი შვილად აყვანის ფაქტი აღმოაჩინა და საკუთარი ფესვების ძიება დაიწყო, ფეისბუქზე შექმნა ჯგუფი „ვეძებ“. ამ პლატფორმის მიზანი იყო, გაეერთიანებინა ყველა ის ადამიანი, ვინც საბჭოთა პერიოდიდან 2005 წლამდე არსებული ბავშვებით ვაჭრობის შავი ბაზრის მსხვერპლი გახდა და ბიოლოგიურ ოჯახებს ეძებდა.
„ვეძებ“ მალევე გადაიქცა სამოქალაქო მოძრაობად, რომელმაც ასობით ოჯახის გაერთიანებას შეუწყო ხელი და საზოგადოებრივი ინტერესი არა მხოლოდ საქართველოში, არამედ მის ფარგლებს გარეთაც გამოიწვია (თამუნა მუსერიძე 2023 წელს BBC-ის 100 ყველაზე გავლენიანი ქალის სიაშიც მოხვდა). ჯგუფის და თამუნა მუსერიძის მთავარი პრინციპი ყოველთვის იყო უფასო მომსახურება – მოძიების პროცესში ოჯახებს არანაირი ფინანსური ვალდებულება არ ეკისრებოდათ.
სწორედ ეს აღმოჩნდა მიზეზი იმ დიდი განხეთქილებისა, რაც ჯგუფის ხელმძღვანელობას შორის მოხდა. სოციალურ ქსელში ფართოდ გავრცელდა თამუნა მუსერიძის ხელმძღვანელობით დაარსებული ჯგუფის “ვეძებ”-ის ადმინისტრატორის, მაია ცქვიტაიას პოსტი, რომლითაც ის გუნდიდან წასვლას აანონსებდა და დამოუკიდებელ საქმიანობაზე გადასვლას ამცნობდა საზოგადოებას.
საპასუხოდ, თავად თამუნა მუსერიძემ ჩართო პირდაპირი ეთერი და ჯგუფში მომხდარ “წარმოუდგენელ ამბავზე“ ისაუბრა. როგორც მუსერიძე აცხადებს, განხეთქილების მიზეზი ჯგუფის მომსახურების, კერძოდ, ბიოლოგიური ოჯახების მოძიების, ფასიანი გახდომის იდეა გახდა, რასაც “ვეძებ“-ის სხვა ადმინისტრატორები კატეგორიულად არ დაეთანხმნენ.
თამუნა მუსერიძის თქმით, მას მერე, რაც “ვეძებ”-ის ჯგუფი დაარსდა, ადმინისტრაციაში გარკვეული შეუთანხმებლობები და ცვლილებები ხდებოდა, თუმცა “არასოდეს მომხდარა ისეთი რამ, რაც ახლა ხდება და წარმოუდგენელია ჩემთვის ეს ამბავი“.
“ჩვენი ჯგუფის მომსახურება, ბიოლოგიური ოჯახის, შვილების, ნათესავების მოძიება არის სრულიად უფასო, ამაში თანხას არ ვიღებთ და ვერც ავიღებთ. თუმცა ჩვენი ჯგუფის ერთ-ერთ ადმინისტრატორს [მაია ცქვიტაიას] გაუჩნდა იდეა, რომ ბიოლოგიური მშობლის მოძებნაში ადამიანს გამოვართვათ ათი ათასი ლარი“, – განაცხადა მუსერიძემ.
მისი თქმით, ეს საუბარი შედგა მას, მაიას, ია ყველაშვილსა და მარიამ ნოზაძეს შორის და “მე, ია და მარიამი ამას კატეგორიულად არ ვეთანხმებოდით“.
“რა ათი ათასი ლარზეა საუბარი, გენეტიკურ ტესტებზე ფასდაკლება თუ არ არის, ხალხი თანხას ვერ იხდის. მაშინ კარგი იყოს, 5 ათასიო, ასეთი აზრი წამოვიდა… ეს ჩემთვის წარმოუდგენელია, რადგან თუ თავად არ ხარ აყვანილი და არ გაქვს გამოცდილი რას ნიშნავს ბიოლოგიური ოჯახის ძიება, შეიძლება ვერ გაიგო… ჩემთვის ეს კატეგორიულად მიუღებელია“, – აღნიშნა თამუნა მუსერიძემ.
მუსერიძის ინფორმაციით, განხეთქილება საბოლოოდ მაშინ მოხდა, როდესაც მაია ცქვიტაიამ თქვა, რომ “მე გავაკეთებ ცალკე „ვეძებ“ ჯგუფის ქვემდგომ ორგანიზაციას და მე მოვითხოვ თანხას, დავასაქმებ ჩემს ახლობლებს და ამ თანხის ნაწილს ჯგუფში ჩავრიცხავ”.
“ეს ჩვენი ჯგუფის სხვა ყველა ადმინისტრატორისთვის მიუღებელი იყო და ის ადამიანი გავუშვით ჩვენი ჯგუფის ადმინისტრატორობიდან… ის ახლა უკმაყოფილოა და ადამიანებს რომელსაც უხარიათ ეს განხეთქილება, ასეირებს და ძალიან ბედნიერები არიან, ჩემთვის გულსატკენია, რადგან მაია იყო ჯგუფში ერთ-ერთი საუკეთესო ადმინისტრატორი… ისე მრცხვენია ამ ლაივის ჩართვა, მირჩევნია მიწა გამისკდეს და ჩამიტანოს, რადგან ეს არის ოჯახის შიდა თეთრეულის გარეთ გამოტანა“, – ამბობს მუსერიძე.
მაია ცქვიტაიას პოზიცია და ბრალდებები
თავის მხრივ, მაია ცქვიტაიამ პოსტში, რომელშიც ჯგუფიდან წასვლას აანონსებდა, აღნიშნა, რომ “ახლა სხვა ეტაპზე გადასვლაა საჭირო“.
“მივიღე გადაწყვეტილება, თავად გავაკეთო მსგავსი ტიპის დაწესებულება, სრულყოფილი მომსახურებით! გსურთ, ხარისხიან გულიანად დაკვალიანება?! გელით! მინდა დაფასებული იქნას შრომა, გარჯა!“, – წერდა ცქვიტაია.
პოსტის კომენტარებში თამუნა მუსერიძემ კიდევ ერთხელ დაადასტურა განსხვავებული პოზიცია: “ბოდიში, მაგრამ დედის მოძიებაში 5 ათას ლარს ვერავის მოვთხოვ. თუ მშობლის ძიების სიმწარე გამოცდილი არ გაქვს, ამას ალბათ ვერ გაიგებ. ჩემთვის ეს ბიზნესი არ არის“.
საპასუხოდ, მაია ცქვიტაიამ აღნიშნა, რომ „შენ ყოველთვის ერთპიროვნულად წყვეტდი და გადაწყვიტე ჩემი ჩახსნა. ჯგუფის დანარჩენი დამაარსებლებიანად“. ის ასევე უარყოფს, რომ ვინმესთვის რაიმე დაპირება მიუცია თანხის სანაცვლოდ:
“ვერცერთ დედას ვერ იპოვი, რაიმე დაპირება მიმეცეს, რომ რაიმეს სანაცვლოდ ვიპოვი… 6 თვე გთხოვდი სერვისი გავაკეთოთ, ჯგუფი დიდია, გვჭირდება, საიტი გვჭირდება, გავიჭირვოთ, ვმობილიზდეთ… დამწყვიტე გული ასე აუხსნელად, რომ მომიშორე“, – წერს ცქვიტაია.
მაია ცქვიტაია უარყოფს თანხის მოთხოვნას
გუშინ კი, მაია ცქვიტაიამ ვიდეო მიმართვა ჩაწერა, სადაც კატეგორიულად უარყო, რომ ვინმესთვის 5 ათასი ლარი მოუთხოვია გახსნილი საქმეების სანაცვლოდ.
“ერთი კითხვა მინდა დავსვა, ის საქმეები რაც აქამდე გამიხსნია და გამიკეთებია, ვინმეს მოვთხოვე თუ არა 5 ათასი ლარი, ასეთი რაღაც დამაბრალეს და თუ არსებობს ასეთი ადამიანი, დამიწეროს კომენტარი როგორ და რანაირად… აუცილებლად მექნება სერვისი, რომლის საშუალებითაც სწორად დავაკვალიანებ ადამიანებს… სერვისის შექმნა ნამდვილად არ არის ცუდი იდეა და საქმე, რადგან ერთი ადამიანი ვერ გაუძღვება 300 ათასკაციან ჯგუფს, ამიტომ ჯობდა ადამიანები დაგვესაქმებინა“, – განაცხადა მაია ცქვიტაიამ.
ის ასევე აღნიშნავს: “ტყუილად ნუ მაბრალებთ, რომ მე თანხებს ვითხოვდი ან მოვითხოვდი… თუ არსებობს ასეთი ადამიანი ვისაც ჩემთვის თანხა ჩაურიცხავს, ბოდიშს მოვუხდი, მაგრამ ასეთი ადამიანი არ არსებობს“.
ამ დროისთვის, სკანდალი და დაპირისპირება „ვეძებ“-ის დამაარსებლებს შორის ჯერ კიდევ გრძელდება და საზოგადოების ყურადღების ცენტრშია.
წყარო : ambebi.ge
