ტრაგედია დატრიალდა ყოფილი დეპუტატის თამაზ ნავერიანის ოჯახში. მისი ახალგაზრდა ვაჟი გარდაცვლილი იპოვეს. 17 წლის გიორგი ნავერიანი დამწყები მსახიობი იყო. როგორც ახლობლები გვიყვებიან, გიორგი ნავერიანი თამაზ ნავერიანის მეოთხე ვაჟი იყო. გიორგი 21 იანვარს ხდებოდა 18 წლის. აბიტურიენტი იყო. პარალელურად მონაწილეობდა სპექტაკლებში, მათ შორის სპექტაკლ “ლუშნუში”, რომელიც მესტიაში დაიდგა.
სწორედ მესტიის კულტურისა და ხელოვნების ცენტრი ავრცელებს სამძიმრის წერილს:
“მესტიის კულტურისა და ხელოვნების ცენტრი ღრმა მწუხარებას გამოთქვამს ჩვენი სპექტაკლის “ლუშნუს” მონაწილეს გიორგი ნავერიანის გარდაცვალების გამო.გიორგი იყო სიცოცხლით, პოზიტივითა და კეთილი ენერგიით აღსავსე ახალგაზრდა, რომელიც თავისი არსებობით მუდამ ახარებდა მის გვერდით მყოფ ადამიანებს… ვუსამძიმრებთ, პირველ რიგში, ოჯახს, ნათესავებს, ახლობლებს, მეგობრებს და ყველას. ღმერთმა გაგაძლიეროთ, სიტყვებიც კი ზედმეტია მწუხარების გადმოსაცემად.გიორგი, ყველას ძალიან დაგვაკლდები” – წერია წერილში.
მარნეულის ყოფილი მაჟორიტარი დეპუტატი თამაზ ნავერიანი საქართველოს მე-9 მოწვევის პარლამენტის, წევრი იყო, “ქართული ოცნების” კვოტით (2016-2020). მას გიორგის გარდა სამი გოგონა ჰყავს. მომხდარი ტრაგედიის შემდეგ ოჯახის ახლობლებს ახალგაზრდაზე წარსულში საუბარი უჭირთ.
“მთელი სვანეთი ტირის. გიორგი იყო ხალისიანი, პოზიტიური, გულიანი, ძალიან კეთილი ახალგაზრდა, რაინდული თვისებების მქონე. მეგობრული. კითხულობდა მხატვრულ ლიტერატურას, მესაუბრებოდა წიგნებზე. თამაშობდა სცენაზე. ვარჯიშობდა ყოველდღე. ამბობდა, მულახში მამაპაპისეულ კოშკს აღვადგენ და სამუზეუმო სივრცედ ვაქცევო. რა უნდა ვთქვა, არც ვიცი. ვინ შეძლებს მშობლების ტკივილის გადმოცემას, მხოლოდ ის შეგვიძლია, გვერდით ვიყოთ და ვუთხრათ: აქ ვართ.. გვერდით. თვითონ თამაზს ძალიან კარგი ოჯახი ჰყავს, ბრწყინვალე მეუღლე, არაჩვეულებრივი გოგონები. იტალიაში დაამთავრა ახლა მისმა ერთ-ერთმა შვილმა მაგისტრატურა, სადაც თავად ჩააბარა გრანტით. ყველას სიკეთის ხელს უწვდიან, ქველმოქმედები არიან, მორწმუნე ოჯახი. რა თქმა უნდა, ყველა ვგლოვობთ” – გვიყვება ნავერიანების ოჯახის ახლობელი.
ემოციურად ემშვიდობებიან 17 წლის გიორგი ნავერიანს სოციალურ ქსელში:
“ნავერიანების მთა ვაჟკაცს თამაზ ნავერიანს კოშკი წაექცა – გიორგი ნავერიანი! წაექცა და მერე როგორ! მიწის საყრდენი გამოაცალა ფეხქვეშ უტორტმანო -კაცურ კაცს!!! იქ გიოს შორიახლოს ვაჟკაცი მამის მგლისებრ ყმუილთან ყველა ძალა გეცლება ადამიანს, იქ ორ მეტრიანი საჯიშე ვაჟკაცი რომ გატრუნული უწევს!!!! აი იქ ფიქრობ საერთოდ ღირს რამე ამქვეყნიური, საერთოდ მნიშვნელობა აქვს რამე სიკეთეს რასაც თესდა ეს ადამიანი – უანგაროდ- კაცურად- ერთგულებით.
დედა- შვილმკვდარი დედა სხვა ფენომენია ამ სამყაროში. დედა იქ უიღბლოა – ჯვარცმული- უკვე სიცოცხლეში-მისჯილი რადგან. თუნდაც ათი შვილი ჰყავდეს იმ ერთის ადგილას ვერასდროს მოვა სხვა დანარჩენი… ნანა-ჩემი კეთილშობილი! ნანა ამაოდ გასძახის ნანატრ გიოს.. რა გინდა ქნა, სად გინდა გაექცე დედის უიმედო ხმას, მონატრებას, სიცარიელეს…
მიეცი ძალა-ღვთისნიერ დედას – სული შეუბეროს მის ლამაზ ოჯახს და ასუნთქოს მის ულამაზეს დაიკოებს – თაკოს, მარიამს, გვანცას. ვერაფერს ვამბობ ჩემო ღიმილის ბიჭო, გულიანო, კეთილო, თბილო, შენ შენი გყოფნის….17 წლისამ ნამეტანი თბილად ხომ არ იცხოვრე ბიჭო??? ნამეტანი სიყვარული ხომ არ დატოვე???” – წერენ სოციალურ ქსელში.
“გიორგი ნავერიანი გამოაკლდა ამ წუთისოფელს! არაჩვეულებრივი ბიჭი დაკარგა საქართველომ! ნამდვილი ვაჟი, რაინდი – შუა საუკუნეებიდან მოსული თავისი სულისკვეთებით, რომანტიკოსი და მგზნებარე, ფორიაქა და საყვარელი, კეთილი, თბილი, ლამაზი, ემოციური, არტისტული და სულ ყმაწვილი, ტუჩზე ჯერ ისევ დედის რძე შეუშრობელი… დაუჯერებელი ამბავია, მაგრამ ასეა და საშინელი ტკივილია… მეექვსე კლასელი იყო, რომ გავიცანი მის არაჩვეულებრივ ოჯახთან: მშობლებთან, დებთან ერთად, – ყველანი ლამაზები, კეთილშობილები, ქართული გენის ნამდვილი სახე!!! გიორგი მათი იმედი და გვარის გამგრძელებელი იყო… მსახიობობა უნდოდა და სულ ამას მეუბნებოდა, ისეთი უნდა გავხდე, ჰოლივუდში რომ მოვეწონოო…” – წერს კიდევ ერთი ახლობელი სოციალურ ქსელში.
წყარო : AMBEBI.GE
