საქართველოს ჯანდაცვის სამინისტრო ორგანიზაცია “იდენტობის” სარჩელთან დაკავშრებით განცხადებას ავრცელებს.
როგორც განცხადებაშია აღნიშნული, 2014 წლის 4 თებერვალს მედიასაშუალებებით გავრცელდა ინფორმაცია საქართველოს საკონსტიტუციო სასამართლოში 2012 წლიდან მიმდინარე სარჩელთან დაკავშირებით. მოსარჩელეები ითხოვდნენ, არაკონსტიტუციურად ყოფილიყო ცნობილი საქართველოს შრომის, ჯანმრთელობისა და სოციალური დაცვის მინისტრის 2000 წლის #241 და 2007 წლის #282 ბრძანებით სისხლის დონაციის ამკრძალავ გარემოებათა ჩამონათვალში არსებული ტერმინი “ჰომოსექსუალიზმი”. საქართველოს საკონსტიტუციო სასამართლომ 2014 წლის 4 თებერვლის გადაწყვეტილებით, დააკმაყოფილა მოსარჩელეთა მოთხოვნა და სადავო ნორმებში არსებული ტერმინი “ჰომოსექსუალიზმი” სცნო არაკონსტიტუციურად.
სამინისტროს განცხადების მიხედვით, 2013 წელს დაიწყო სისხლის დონაციის რეგულაციების კომპლექსური რევიზია. აღნიშნული მუშაობა მოიცავს როგორც ტერმინოლოგიურ, ასევე ადმინისტრაციულ და ხარისხის კონტროლის საკითხებს.
“პირველ ეტაპზე, ჯანდაცვის სამინისტრომ ჩაატარდა ევროპის, ამერიკისა და სხვა რეგიონის ქვეყნებში არსებული კანონმდებლობის სრული ანალიზი სისხლის დონაციის წინააღმდეგ-ჩვენებებთან დაკავშირებით, რომ დაედგინა თუ რამდენად ეხმიანებოდა საქართველოში სისხლის დონაციის არსებული შეზღუდვები საერთაშორისო სტანდარტებს. ამასთანავე, სამინისტრომ სისხლის ბანკების, გაეროს სააგენტოებისა და არასამთავრობო ორგანიზაციების წარმომადგენლებთან გამართა საკონსულტაციო შეხვედრები, რომლის ფარგლებშიც მოხდა შეთანხმება “ჰომოსექსუალიზმის” როგორც დისკრიმინაციული ტერმინის ცვლილების მიზანშეწონილობასთან დაკავშირებით. აღნიშნული მუშაობის შედეგად, 2013 წლის 8 ოქტომბერს ჯანდაცვის მინისტრის N01–38/ნ და N01–39/ნ ბრძანებებით სისხლის დონაციის წინააღმდეგ ჩვენებებში “ჰომოსექსუალიზმი” შეიცვალა ტერმინით “მამაკაცის სქესობრივი კავშირი მამაკაცთან”, რამეთუ აღნიშნული ქცევა სამეცნიერო კვლევებისა და საერთაშორისო რეკომენდაციების საფუძველზე უკავშირდება სისხლის გზით გადამდები დაავადებების შეძენის განსაკუთრებით მაღალ რისკს. 2013 წლის 8 ოქტომბერის მინისტრის N01–38/ნ და N01–39/ნ ბრძანებებით ჯანდაცვის სამინისტრომ სისხლის დონაციის უკუჩვენებები შესაბამისობაში მოიყვანა მსოფლიოს უმრავლეს ქვეყნებში მოქმედ რეგულაციებთან. “მამაკაცის სქესობრივი კავშირი მამაკაცთან” ქვეყნების აბსოლუტურ უმრავლესობაში (მათ შორის ამერიკის შეერთებულ შტატებში, ბელგიაში, ავსტრიაში, დანიაში, საფრანგეთში, გერმანიაში და სხვ.) განსაზღვრულია, როგორც სისხლის დონორობის უკუჩვენება. შესაბამისად, საკონსტიტუციო სასამართლოს გადაწყვეტილების გამოქვეყნების მომენტში, სადავო ჩანაწერები ჯანდაცვის მინისტრის ბრძანებებში აღარ არსებობდა. თუმცა საკონსტიტუციო სამართალწარმოების შესახებ საქართველოს კანონმდებლობიდან გამომდინარე, სასამართლომ იმსჯელა და გადაწყვეტილება მიიღო 2012 წლის 11 ივლისის სარჩელში მითითებული მოთხოვნების შესაბამისად. აქვე მოგახსენებთ, რომ ჯანდაცვის სამინისტრო აგრძელებს მუშაობას სისხლის დონაციის რეგულაციების შემდგომ დახვეწაზე, რათა მაქსიმალურად იყოს დაცული როგორც ინდივიდუალური მოქალაქის უფლებები ასევე საზოგადოებრივი ჯანდაცვის სტრატეგიული ინტერესები”,-ნათქვამია ჯანდაცვის სამინისტროს განცხადებაში.
06.02.14