სისხლი და ცხედრები მაიდანზე – კიევში სიტუაცია უკონტროლოა. ოფიციალური ცნობით, მსხვერპლის რაოდენობა 35-მდეა გაზრდილი. დაღუპულებს ცეცხლნასროლი ჭრილობები აქვთ მიყენებული.
ცხედრები პირდაპირ დამოუკიდებლობის მოედანზე ასვენია, რამდენიმე დაღუპულის გვამი კი მაიდანზე მდებარე სასტუმრო ,,უკრაინის” შესასვლელში გადაასვენეს. შენობის მიმართულებით ისმის სროლის ხმა. მოედნის გარშემო თითქმის ყველა შენობის თავზე სნაიპერები დგანან.
ყოველ წუთს იზრდება დაჭრილებიც რიცხვიც. ქალაქის ცენტრში მობილიზებულია სასწრაფო დახმარების ჯგუფები. ექიმები დაზარალებულებს პირველად დახმარებას ადგილზევე უწევენ, რის შემდეგაც დაშავებულები საავადმყოფოებში გადაჰყავთ.
პარალელურად, დემონსტრანტები პოზიციებს აძლიერებენ: მაიდნის გარდა, დამატებითი ბარიკადები გრუშევსკის ქუჩაზეც ეწყობა. მედიასაშუალებების ნაწილი ღიად წერს, რომ ქალაქში სამოქალაქო ომია.
მაიდნის თითქმის მთელ პერიმეტრს დემონსტრანტები იკავებენ. არეულობა კიევის ცენტრში მას შემდეგ დაიწყო, რაც მომიტინგეები შეტევაზე გადავიდნენ. აქციის მონაწილეებმა მოედნის ერთი პერიმეტრი “ბერკუტელებისგან” მთლიანად გაწმინდეს და სპეცრაზმელების მძევლებად აყვანა დაიწყეს, რა დროსაც 20-მდე სამართალდამცველი დაიჭრა.
დაპირისპირებული მხარეები ერთმანეთის მიმართულებით ქვებს, მოლოტოვის კოქტეილებსა და ხმოვან ყუმბარებს ისვრიან. იწვის საბურავებიც. მაიდანი ცეცხლის ალშია.
ქალაქი საგანგებო მდგომარეობის გამოცხადების ზღვარზეა. წინასწარი მონაცემებით, დღეს დილიდან დაჭრილთა რიცხვი რამდენიმე ასეულს აჭარბებს. საქართველოს საელჩო კიევში მყოფ საქართველოს მოქალაქეებს მიმართავს და მასობრივი თავშეყრის ადგილებში გადაადგილებისგან თავის შეკავებისკენ მოუწოდებს.
,,მოამბის” გადამღები ჯგუფი კიევის ცენტრში მუშაობს. მოვლენებს ქეთი ქარდავა და დავით ფირუმაშვილი აშუქებენ.
20.02.14
