შერიგებისა და სამოქალაქო თანასწორობის საკითხებში სახელმწიფო მინისტრი პაატა ზაქარეიშვილი აფხაზეთისთვის ფინანსური დახმარების გაწევის საკითხს კიდევ ერთხელ ეხმაურება და აცხადებს, რომ ამ ტიპის ორგანიზაციების საქმიანობას მიესალმება.
როგორც ზაქარეიშვილმა მთავრობის დღევანდელი სხდომის დაწყების წინ ჟურნალისტებს განუცხადა, აფხაზებს დახმარება სჭირდებათ.
“ეს არ არის გაერო-ს გადაწყვეტილება. ესაა “გაერო-ს განვითარების პროგრამის საქართველოში” გადაწყვეტილება. ეს ოფისი 20 წელია, საქართველოში მუშაობს და ჩვენს ტერიტორიაზე ამ ტიპის პროგრამებს რეგულარულად ახორციელებს. იმ ინფორმაციით, რაც გავრცელდა, ეს იგივე – პროგრამაა, რაც მანამდეც ხორციელდებოდა. რაც შეეხება იმას, რატომ შეხვდა ორგანიზაციის წარმომადგენლები დე ფაქტო პრეზიდენტს, აბა ვის უნდა შეხვედროდნენ? ისინი ყოველთვის დე ფაქტო პრეზიდენტებს ხვდებოდნენ. ეს ხალხი იქ ჩადის, რათა მათ დაეხმარონ, როგორც საქართველოს ტერიტორიაზე მცხოვრებ მოქალაქეებს. მათ დახმარება სჭირდებათ, აბა, მსოფლიო არ დაეხმაროს აფხაზებს? აბა, არ უნდა ხორციელდებოდეს ღონისძიებები, რომ იქ ნორმალური ადამიანები იბადებოდნენ? ჩვენ გვეხმარებიან საერთაშორისო ორგანიზაცების წარმომადგენლები და მე მივესალმები ამ ტიპის ორგანიზაციების საქმიანობას აფხაზეთსა და ე.წ.სამხრეთ ოსეთის ტერიტორიაზე”, – განაცხადა პაატა ზაქარეიშვილმა.
ამასთან, მან ქართულ მედიას თხნოვით მიმართა, აფხაზური სააგენტოების მიერ გავრცელებულ ინფორმაციებს “ნამეტანი ისტერიკით” ნუ შეხვდებიან, რადგან “მათ ანქვაბი სათავისოდ ფუთავს”.
“თქვენ გაქვთ ინფორმაცია აფხაზეთის სააგენტოებიდან და ხშირად ჩვენ ვრეაგირებთ ინფორმაციაზე, რომელსაც არასწორად ავრცელებენ ისინი. გთხოვთ, როცა სოხუმიდან, ცხინვალიდან ვრცელდება ინფორმაცია, ის მიიღეთ (არ გეუბნებით, არ დაუჯერეთთქო), მაგრამ ნამეტანი ისტერიკა საჭირო არაა. ბუნებრივია, ანქვაბი იქნება თუ თიბილოვი, თავის სასარგებლოდ ფუთავენ ინფორმაციებს”, – აღნიშნა ზაქარეიშვილმა.
ამასთან, სახელმწიფო მინისტრის ინფორმაციით, საქართველოში გაერო-ს განვითარების პროგრამის წარმომადგენლებს რამდენიმე დღეში შეხვდება და მიიღებს ინფორმაციას კონკრეტულად რა პროგრამაზეა საუბარი.
13.03.14
