არასამთავრობო ორგანიზაციები კომპანია RMG GOLD-ს საყდრისი-ყაჩაღიანის ისტორიული საბადოს მიზანმიმართულ განადგურებაში ადანაშაულებენ. “ფრონტლაინ ჯორჯიას” ოფისში, დღეს, 10-ზე მეტმა არასამთავრობო ორგანიზაციის წარმომადგენელმა ისტორიული საყდრისის საბადოს გადასარჩენად ერთობლივი პრესკონფერენცია გამართა.
პრესკონფერენციის ორგანიზატორები ისტორიულ საბადოსთან დაკავშირებით, გუშინ პრემიერისა და დღეს კულტურის სამინისტორს მიერ გაკეთებულ განცხადებას გამოეხმაურნენ.
ხელოვნებათმცოდნეობის დოქტორის მარინე მიზანდარის განცხადებით, 13 იანვარს, კულტურის სამინისტროს არქეოლოგიური საბჭოს გაფართოებულ სხდომაზე 11 არქეოლოგის მიერ დასკვნა დაიდო. ამ დასკვნით, საყდრისი-ყაჩაღიანის ისტორიული საბადო არქეოლოგიურად სრულად არ იყო შესწავლილი და საჭიროა დამატებითი არქეოლოგიური კვლევების ჩატარება, რომლის გარეშეც კომპანია RMG GOLD იქ სამუშაოებს ვერ განახორციელებდა.
მისივე თქმით, კულტურის სამინისტროს დღევანდელი განცხადებით კი, საყდრისი-ყაჩაღიანის საბადოს ისტორიული მნიშვნელობა არ გააჩნია და იქ კომპანიამ სამუშაოები უნდა გააგრძელოს. მიზანდარის თქმით, 13 იანვრის შემდეგ საბადოზე არანაირი არქეოლოგიური კვლევები არ ჩატარებულა, ამდენად თუკი არსებობს რაიმე დასკვნა საბადოს შესახებ, იგი არაკვალიფიციურია.
ხელოვნებათმცოდნე ლალი პერტენავას თქმით კი, ძეგლთან დაკავშირებით სამინისტროს მიერ მიღებულ აქტს სასამართლოში გაასაჩივრებენ. იგი იმედს გამოთქვამს, რომ აღნიშნული საბადო სასამართლოს გადაწყვეტილების მიღებამდე არ განადგურდება.
არასამთავრობო ორგანიზაციების წარმომადეგნელები ელიტური კორუფციის ნიშნებზე საუბრობენ და კონკრეტული სამართლადღვევის ფაქტის შესწავლას ითხოვენ. მარინე მიზანდარის განცხადებით, კომპანია RMG GOLD-მა სამინისტროს მიერ მიღებული 13 იანვრის გადაწყვეტილება გაასაჩივრა და კანცელარიას ადმინისტრაციული საჩივრით მიმართა.
მისივე თქმით, კანცელარიაში დახურული სხდომა მოეწყო, სადაც კულტურის სამინისტროდან მხოლოდ იურისტი მონაწილეობდა. მიზანდარი აცხადებს, რომ იგი ამ შეხვედრას ვერ დაესწრო და არც სპეციალისტები არ მიუწვევიათ. მისთვის უცნობია 21 თებერვალს რა გადაწყვეტილება მიიღეს კანცელარიაში.
“სამწუხაროა, რომ ხელისუფლებას კულტურის მიმართ სახელმწიფოებრივი ხედვა არ გააჩნია. ეს ძალიან ცუდ შედეგს მოუტანს კულტურულ მემკვიდრეობას. კულტურული მემკვიდრეობა არის ის საყრდენი, რომლის სწორად განვითარება ქვეყნის ეკონომიკის სიცოცხლისუნარიან განვითარებას წარმოშობს”, – აღნიშნა მიზანდარმა.
მისივე თქმით, თავად კომპანია აცხადებს, რომ საყდრისი-ყაჩაღიანის ტერიტორიაზე მხოლოდ ოქროს მოპოვების 2 თვის მარაგია. მისი განადგურებით კი უძველესი სამთომადნო ძეგლის 4-ათასწლიანი ცივილიზაციის ისტორია ისპობა.
პრესკონფერენციაზე, მიზანდარმა წარმოადგინა წიგნი, რომელშიც ისტორიულ საბადოსთან დაკავშირებით გერმანულ, ფრანგულ და ინგლისურ ენაზე შექმნილი სამეცნიერო ნაშრომებია გამოქვეყნებული.
არასამთავრობო ორგანიზაცია “ძეგლის მეგობრის” ხელმძღვანელმა, სტუდენტმა სალომე ჭანტურიძემ განაცხადა, რომ ძეგლის დასაცავად ხვალ თსუ-ს II კორპუსთან სტუდენტები საპროტესტო აქციას გამართავენ და ხელისუფლებას ძეგლის შენარჩუნებას მოსთხოვენ.
14.03.14
Discussion about this post