დიდი ბრიტანეთის საგარეო საქმეთა მინისტრი უილიამ ჰეიგი ყირიმში ჩატარებულ რეფერენდუმს გმობს. ყირიმში ჩატარებულ რეფერენდუმთან დაკავშირებით უილიამ ჰეიგის განცხადება დიდი ბრიტანეთის მთავრობის ოფიციალურ ვებგვერდზე გამოქვეყნდა.
“მე ვგმობ იმ ფაქტს, რომ რეფერენდუმი ჩატარდა უკრაინის კონსტიტუციის დარღვევით და საერთაშორისო თანამეგობრობის მოწოდებების უგულველყოფით. რეფერენდუმის ჩატარებამ არავინ უნდა დაარწმუნოს იმაში, რომ ის ლეგიტიმური იყო. რეფერენდუმის ჩატარებაზე ცნობა 10 დღით ადრე გავრცელდა, სათანადო კამპანიისა და საჯარო დებატების ჩატარების გარეშე. ქვეყნის პოლიტიკურ ლიდერებს არ ჰქონდათ იმის შესაძლებლობა, რომ ყირიმში ჩასულიყვნენ”, – აცხადებს დიდი ბრიტანეთის საგარეო საქმეთა მინისტრი.
მისივე თქმით, რეფერენდუმი ჩატარდა უცხო ქვეყნის ათასობით ჯარისკაცის თანდასწრებით და ეს ჭეშმარიტი დემოკრატიული პრაქტიკის დაცინვაა. როგორც ჰეიგი აღნიშნავს, გაერთიანებული სამეფო, ისევე, როგორც საერთაშორისო თანამეგობრობის უმრავლესობა, არ სცნობს რეფერენდუმს და მის შედეგებს.
“ევროკავშირის საგარეო საქმეთა მინისტრების შეხვედრაზე ბრიუსელში უნდა იყოს მიღებული ზომები, რათა მკაცრი სიგნალი გავუგზავნოთ რუსეთს, რომ ეს გამოწვევა უკრაინის სუვერენიტეტისთვისა და ტერიტორიული მთლიანობისთვის იქონიებს პოლიტიკურ და ეკონომიკურ შედეგებს რუსეთისთვის. ნებისმიერი მცდელობა რუსეთის მხრიდან, გამოიყენოს რეფერენდუმი, როგორც ყირიმის ანექსიის მცდელობა, იქნება მიუღებელი. მოვუწოდებ რუსეთს დიალოგის დაწყებისკენ უკრაინასთან და საერთაშორისო თანამეგობრობასთან, კრიზისის გადასაწყვეტად, დიპლომატიური მექანიზმების გამოყენებით და არ გაამწვავოს სიტუაცია ერთმხრივი და პროვოკაციული ქმედებებით”, – აცხადებს ჰეიგი.
ეგზიტპოლის შედეგების თანახმად, რეფერენდუმზე მისული ყირიმის მოსახლეობის 93%-მა რუსეთთან შეერთებას დაუჭირა მხარი. ერთადერთი ეგზიტპოლის შედეგები “კრიმ ინფორმ”-მა გამოაქვეყნა.
17.03.14