ფინანსთა მინისტრ ნოდარ ხადურის განცხადებით, 2012 წლის საპარლამენტო არჩევნების შემდეგ ქვეყანაში “პიარზე ორიენტირებული რეფორმების მანკიერი პრაქტიკა” დასრულდა.
როგორც ნოდარ ხადურმა სასტუმრო “რედისონში” მსოფლიო საბაჟო ორგანიზაციის ევროპის რეგიონის საბაჟო ადმინისტრაციების ხელმძღვანელების კონფერენციაზე სიტყვით გამოსვლისას განაცხადა, სწორედ იმ პერიოდიდან მოყოლებული, მუდმივად იხვეწება და ვითარდება საქართველოში სერვისების ხელმისაწვდომობა.
“2012 წლის საპარლამენტო არჩევნების შემდეგ, საბაჟო სისტემაში განმტკიცდა სამართლიანობის პრინციპი, მუდმივად იხვეწება და ვითარდება სერვისების ხელმისაწვდომობა, აღმოიფხვრა შერჩევითი სამართლისა და პიარზე ორიენტირებული რეფორმების მანკიერი პრაქტიკა, თამამად შეიძლება ითქვას, რომ საბაჟო, ქვეყნის ერთ-ერთი სწრაფად განვითარებადი ინსტიტუციაა”, – განაცხადა ნოდარ ხადურმა სიტყვით გამოსვლისას.
ამასთან, მისივე განმარტებით, ბიზნესსექტორთან აქტიური კონსულტაცია ქვეყანას საშუალებას აძლევს შექმნას ბიზნესზე მორგებული საკანონმდებლო აღმასრულებელი და სასამართლო სისტემაც.
“ეს უზრუნველყოფს ბიზნესის წარმატებით ოპერირებას”, – აღნიშნა ხადურმა.
17.03.14
