თბილისის განვითარების ფონდის საქმეზე გიგი უგულავას წინა სასამართლო პროცესი 2 აპრილისთვის გადაიდო.
დღევანდელ სხდომაზე მხარეებმა წარმოადგინეს რამდენიმე შუამდგომლობა. ბრალდების მხარემ მოითხოვა, რომ მტკიცებულებად არ დაიშვას ზურაბ ადეიშვილისა და გიორგი საბანაძის გამოკითხვის ოქმები. როგორც პროკურორებმა განმარტეს, ამ გამოკითხვის ოქმებში მითითებულია, რომ ეს ადამიანები გამოიკითხნენ ქვეყნის საზღვრებს გარეთ, ადვოკატებს კი ქვეყნის საზღვრებს გარეთ ნებართვის გარეშე თავისი საქმიანობის ჩატარების უფლება არ აქვთ.
ამასთანავე, ბრალდების მხარემ განაცხადა დღევანდელ სასამართლო პროცესზე, რომ ზურაბ ადეიშვილის ოქმში არ არის მითითებული რაიმე მაიდენტიფიცირებელი მონაცემი.
“ზურაბ ადეიშვილის გამოკითხვის ოქმი ეჭვქვეშ დგება, რადგან გარდა პირადი ნომრისა, მასზე არ არის დატანილი არანაირი მაიდენტიფიცირებელი მონაცემი. ზურაბ ადეიშვილი არის წითელი ცირკულარით ძებნაში და ამის ნახვა ინტერპოლის საიტზეც შესაძლებელია, მისი ადვოკატი აცხადებს, რომ საყოველთაოდ ცნობილია, რომ ზურაბ ადეიშვილი არის უნგრეთში, თუმცა ეს ჩვენთვის ცნობილი არ არის. აღსანიშნავია ისიც, გამოკითხვის ოქმში მითითებულია, რომ ეს გამოკითხვა შედგა ქალაქ კესტელში, თუმცა ასეთი სახელით ქალაქი მსოფლოს ოთხ ქვეყანაშია. ასევე, გამოკითხვის ოქმში მისამართად მითითებულია დები იშხნელების ქუჩა, თუმცა, ყველამ ვიცით, რომ ზურაბ ადეიშვილი ამჟამად იქ არ ცხოვრობს, – განაცხადეს პროკურორებმა.
რაც შეეხება დაცვის მხარეს, დაცვის მხარის შუამდგომლობაა, რომ მტკიცებულებად არ დაიშვას გიგი უგულავასა და მის შვილს შორის მიმოწერა. როგორც დაცვის მხარემ განმარტა, ეს არის პირადი ხელშეუხებლობის დარღვევა და ამ ჩანაწერს საქმესთან არანაირი კავშირი არ აქვს. ასევე დაცვის მხარის შუამდგომლობით არ უნდა ჩაიდოს საქმეში ბრალდებულების დავით ავალიანის, დავით ალავიძის, დიმიტრი ჩხეიძის დაკითხვის ოქმები. როგორც დაცვის მხარე აცხადებს, ამ ადამიანების დაკითხვა მოხდა ზეწოლის შედეგად.
17.03.14
