თებერვალში საქართველოში შემოსული ფულადი გზავნილების ნაკადები გაიზარდა

მიმდინარე წლის თებერვალში საქართველოში 186,2 მლნ ლარის ოდენობის ფულადი გზავნილები შემოვიდა.

როგორც “თბილისი თაიმს” ეროვნული ბანკიდან აცნობეს , აღნიშნული მაჩვენებელი წინა წლის ანალოგიური პერიოდის მონაცემებს 5,1 მლნ ლარით აღემატება.

“2014 წლის თებერვალში ქვეყანაში შემოსული ფულადი გზავნილების ნაკადების მოცულობამ 106.5 მლნ აშშ დოლარი, ანუ 186.2 მლნ ლარი შეადგინა, რაც 2.9 მლნ აშშ დოლარით (5.1 მლნ ლარით), ანუ 2.8 პროცენტით მეტია 2013 წლის თებერვლის ანალოგიურ მაჩვენებელზე”, – აცხადებენ ეროვნულ ბანკში.

უშუალოდ ქვეყნების მიხედვით ფულადი გზავნილების სტატისტიკურ მაჩვენებელში რუსეთის ფედერაცია ლიდერობს – საქართველოში აღნიშნულ პერიოდში ყველაზე დიდი მოცულობის ფულადი გზავნილი სწორედ ამ მეზობელი ქვეყნიდან შემოვიდა (51,4 მლნ დოლარი). შემდეგ მოდიან საბერძნეთი (16,7 მლნ დოლარი), იტალია (9,3 მლნ დოლარი), აშშ (5,6 მლნ დოლარი), თურქეთი (4,4 მლნ დოლარი), უკრაინა (3,0 მლნ დოლარი), ესპანეთი (2,1 მლნ დოლარი), გერმანია (1,7 მლნ დოლარი), ისრაელი (1,5 მლნ დოლარი), აზერბაიჯანი (1,2 მლნ დოლარი), ყაზახეთი (1,1 მლნ დოლარი) და სხვა ქვეყნები.

ამასთან, ეროვნული ბანკის ცნობით, უცხოეთიდან საქართველოში ფულადი გზავნილების 92.0 პროცენტი იმ 11 უმსხვილეს დონორ ქვეყანაზე მოდის, საიდანაც ასეთი გზავნილების მოცულობამ თებერვალში 1 მლნ აშშ დოლარს გადააჭარბა. მათივე განმარტებით, იმავე 11 ქვეყანაზე გასული წლის თებერვალში მთელი ფულადი გზავნილების 92.6 პროცენტი მოდიოდა.

გარდა ამისა, ოფიციალური ინფორმაციით, 2014 წლის თებერვალში საქართველოდან საზღვარგარეთ 12.9 მლნ აშშ დოლარი (22.5 მლნ ლარი) გადაიგზავნა, მაშინ როცა გასული წლის თებერვალში შესაბამისი მაჩვენებელი 10.8 მლნ აშშ დოლარს (17.9 მლნ ლარს) შეადგენდა.

18.03.14