საქართველოს პრემიერ-მინისტრმა ირაკლი ღარიბაშვილმა მარნეულის მოსახლეობას ნოვრუზ ბაირამის დღესასწაული მიულოცა. პრემიერმა სიტყვით გამოსვლა აზერბაიჯანულ ენაზე დაიწყო. “ნოვრუზ ბაირამნეზ მუბარეკ ოლსუნ!”
გილოცავთ ნოვრუზ ბაირამს, ამ ლამაზ დღესასწაულს, გაზაფხულის განახლების, სიცოცხლის და სიყვარულის დღეს. მე ვუერთდები დღეს თქვენს ზეიმს, მთელი გულით ვიზიარებ თქვენს ამ სიხარულს. ჩვენ ვართ ერთი ქვეყნის შვილები. ჩვენი წინაპრები ერთად ცხოვრობდნენ, ერთად შრომობდნენ, ერთად ემსახურებოდნენ ჩვენს სამშობლოს – ჩვენს საქართველოს. ყოველთვის იზიარებდნენ ერთმანეთის ჭირს და ლხინს. ასე იყვნენ ჩვენი წინაპრები, ასე ვართ ჩვენც და მე მჯერა, რომ ასე იქნება, ასე გაგრძელდება, ჩვენი შვილები გააგრძელებენ ამ ტრადიციას”, – მიმართა მოსახლეობას ღარიბაშვილმა.
მან მარნეულში შეკრებილ მოსახლეობას განსაკუთრებული ხალხი უწოდა და აღნიშნა, რომ ისინი განსაკუთრებით მშრომელი ხალხი არიან, რომლებიც სოფლის მეურნეობის პროდუქტით ამარაგებენ მთლიანად საქართველოს.
“მე მინდა გითხრათ, რომ ეს ჩვენთვის და ზოგადად ჩვენი ქვეყნისთვის, ჩვენი მთავრობისთვის ძალიან მნიშვნელოვანია. ჩვენ და პირადად მე ძალღონეს არ დავიშურებ, გავაკეთებ ყველაფერს, რომ თქვენი შრომა დავაფასო ადეკვატურად და ჯეროვნად. მე გავაკეთებ ყველაფერს იმისთვის, რომ თითოეულმა თქვენმა ოჯახმა იგრძნოს კეთილდღეობა, ის რაც შეიქმნება ჩვენს სამშობლოში. ჩვენ გვინდა, რომ თქვენს შვილებს ჰქონდეთ სწავლისა და განვითარების პირობები. მიხარია, რომ აქაური ახალგაზრდობა ძალიან მონდომებულია იცოდეს ქართული ენა”, – აღნიშნა პრემიერმა.
მან ადგილობრივებს მოუწოდა, მაქსიმალურად ჩაერთონ სახელმწიფო ენის შესწავლის პროექტებში, რადგან ქართული ენის ცოდნა მათ დაეხმარება სხვადასხვა პროფესიის დაუფლებაში, უმაღლესი განათლების მიღებაში და საბოლოოდ ისინი შეძლებენ სრულფასოვანი მონაწილეობა მიიღონ სახელმწიფოს მშენებლობაში.
“მე მივესალმები, რომ თქვენ არ კარგავთ კავშირს თქვენს ისტორიულ სამშობლოსთან, აზერბაიჯანი საქართველოს ერთგული მეგობარი და სტრატეგიული პარტნიორია. ვიცი, რომ თქვენთვის ერთნაირად ძვირფასია აზერბაიჯანიც და საქართველოც. დღეს, ჩვენს აზერბაიჯანელ მოქალაქეებს და ქართველებს ერთი ქვეყანა გვაქვს. ჩვენ ერთად ვაშენებთ ჩვენი ქვეყნის ბედნიერ მომავალს და ბედნიერად ვიცხოვრებთ ერთიან ძლიერ საქართველოში”, – დასძინა პრემიერ-მინისტრმა.
21.03.14
