აშშ-ის პრეზიდენტმა ბარაკ ობამამ გუშინ ბრიუსელში განაცხადა, რომ ნატო-ს დაუყოვნებელი გაფართოების გეგმა დღის წესრიგში არ დგას.
“არც უკრაინა და არც საქართველო ამჟამად არ დგანან ნატოში გაწევრიანების გზაზე. არ ყოფილა და არ არის ნატო-ს დაუყოვნებელი გაფართოების გეგმა”, – აღნიშნა აშშ-ის პრეზიდენტმა ამერიკა-ევროკავშირის სამიტთან დაკავშირებით გამართულ პრესკონფერენციაზე.
ობამას განცხადებით, რუსული მხარის შეშფოთების ერთ-ერთ მთავარ მიზეზს უკრაინის ნატო-ში შესაძლო გაწევრიანება წარმოადგენს, თუმცა, აშშ-ის პრეზიდენტის თქმით, უახლოეს მომავალში ეს არ იგეგმება.
მისივე თქმით, აშშ-სა და ევროკავშირს სურთ, ალიანსის არაწევრი ქვეყნებიდან მხარდაჭერა გაუწიონ იმ სახელმწიფოებს, რომლებიც იზიარებენ დასავლეთის პრინციპებს და იდეალებს. “ამიტომ ყველა ზომას მივმართავთ, რათა მხარი დავუჭიროთ უკრაინას – მის არჩევნებს, მის ეკონომიკას და გავაგრძელოთ რუსეთის იზოლაცია იმ ნაბიჯებზე საპასუხოდ, რომლებიც მან გადადგა”, – განაცხადა ბარაქ ობამამ ბრიუსელში ვიზიტისას.
27.03.14
