ჩვენ არასოდეს არ გვითქვამს, რომ წლევანდელ სამიტზე საქართველოს ნატო-ში მიიღებენ, – ამის შესახებ საქართველოს საგარეო საქმეთა მინისტრმა მაია ფანჯიკიძემ ჟურნალისტებს ამერიკის შეერთებული შტატების პრეზიდენტ ბარაკ ობამას განცხადების კომენტირებისას განუცხადა.
როგორც მაია ფანჯიკიძემ აღნიშნა, ამერიკის შეერთებული შტატების პრეზიდენტს არ უთქვამს, რომ საქართველო და უკრაინა არ არიან ნატო-სკენ მიმავალ გზაზე. ფანჯიკიძე მიიჩნევს, რომ საქართველო მტკიცედ მიემართება ნატო-სკენ მიმავალ გზაზე, რაც იმას ნიშნავს, რომ იგი ამ გზაზე ახორციელებს დემოკრატიულ რეფორმებს, აძლიერებს დემოკრატიას.
“ჩვენ ყოველთვის ვამბობდით და ეს ასეც იქნება, რომ სამიტზე ასახული იქნება ის პროგრესი, რაც საქართველოში მოხდა წელიწადნახევარი-ორი წლის განმავლობაში. ასე, რომ ჩვენ ამ გზაზე ვდგავართ, ამის საწინააღმდეგო არავის არაფერი უთქვამს. ამ გზაზე მივდივართ რწმენით, რომ ერთ დღეს საქართველო გახდება ნატო-ს წევრი, ხოლო ის, რომ შეიძლება არ მოხდეს ამ სამიტზე, მე მგონი, ეს არავისთვის გასაკვირი არ უნდა იყოს”, – განაცხადა მაია ფანჯიკიძემ.
აშშ-ის პრეზიდენტმა ბარაკ ობამამ გუშინ ბრიუსელში განაცხადა, რომ ნატოს დაუყოვნებელი გაფართოების გეგმა დღის წესრიგში არ დგას.
“არც უკრაინა და არც საქართველო ამჟამად არ დგანან ნატოში გაწევრიანების გზაზე. არ ყოფილა და არ არის ნატოს დაუყოვნებელი გაფართოების გეგმა”, – აღნიშნა აშშ-ის პრეზიდენტმა ამერიკა-ევროკავშირის სამიტთან დაკავშირებით გამართულ პრესკონფერენციაზე.
ობამას განცხადებით, რუსული მხარის შეშფოთების ერთ-ერთ მთავარ მიზეზს უკრაინის ნატოში შესაძლო გაწევრიანება წარმოადგენს, თუმცა, აშშ-ს პრეზიდენტის თქმით, უახლოეს მომავალში ეს არ იგეგმება.
მისივე თქმით, აშშ-სა და ევროკავშირს სურთ, ალიანსის არაწევრი ქვეყნებიდან მხარდაჭერა გაუწიონ იმ სახელმწიფოებს, რომლებიც იზიარებენ დასავლეთის პრინციპებს და იდეალებს. “ამიტომ ყველა ზომას მივმართავთ, რათა მხარი დავუჭიროთ უკრაინას – მის არჩევნებს, მის ეკონომიკას და გავაგრძელოთ რუსეთის იზოლაცია იმ ნაბიჯებზე საპასუხოდ, რომლებიც მან გადადგა”, – განაცხადა ბარაქ ობამამ ბრიუსელში ვიზიტისას.
27.03.14
