პრემიერ-მინისტრ ირაკლი ღარიბაშვილის განცხადებით, მან მოვლენებს გაუსწრო როდესაც თქვა, რომ სააკაშვილზე ძებნა გამოცხადდება. ამის შესახებ ღარიბაშვილმა ჟურნალისტებს საგამოფენო ცენტრ “ექსპო ჯორჯიაში” განუცხადა, სადაც საერთაშორისო კონფერენცია “ეკონომიკურ ინტეგრაცია ევროკავშირთან – პერსპექტივები და შესაძლებლობები” მიმდინარეობს.
რაც შეეხება კითხვის ნიშნებს იმასთან დაკავშირებით, რომ ყოფილი პრეზიდენტი დაკითხვაზე დაბარებულია ერთდროულად 10 საქმესთან დაკავშირებით, ღარიბაშვილის თქმით, ეს ინსტიტუტებისადმი პატივისცემის გამოხატულებაა, რომ 10-ჯერ არ დაიბარეს. ამასთან, პრემიერის ინფორმაციით, პროკურატურა დღევანდელ ბრიფინგზე განმარტავს, რა იქნება შემდგომი ნაბიჯები მიხეილ სააკაშვილთან მიმართებაში.
“დღეს ჩემი ინფორმაციით, პროკურატურა გეგმავს ჩაატაროს ბრიფინგი, სადაც დეტალურად განმარტავს თუ შემდგომი ეტაპები რა იქნება. გარდა იმისა რომ არსებობს მოწმის დაკითხვა პროკურატურაში, არსებობს სხვა საშუალებები – მაგალითად, იგივე ვიდეოსაშუალებით დაკითხვა სასამართლოში, რაც არის კიდევ ერთი დადასტურება, რომ ჩვენ აბსოლუტურად შევცვალეთ სტანდარტები და გადავედით ევროპულ სტანდარტებზე. ეს არის მეორე ეტაპი. შემდგომ უკვე გააკეთებს ამასთან დაკავშირებით დეტალურ კომენტარს პროკურატურა”, – განაცხადა ღარიბაშვილმა.
რაც შეეხება მიხეილ სააკაშვილზე ძებნის გამოცხადების შესახებ პრემიერის განცხადებაზე დასმულ კითხვას, ღარიბაშვილმა აღნიშნა: “მე მოვლენებს გავუსწარი უბრალოდ”.
“ჩემი შეფასება იყო და ამას უფრო კარგად განმარტავენ პროფესიონალები, ვგულისხმობ პროკურატურას და ისინი უფრო კარგად აუხსნიან მოსახლეობას თუ რა არის შემდგომი ეტაპები. იმის თაობაზე, რომ სააკაშვილი არის დაბარებული 10 საკითხზე, მე მოვისმინე არა მხოლოდ ადგილობრივი ორგანიზაციების, ისე უცხოელების შეკითხვები თუ რატომ მოხდა ერთდროულად 10 საკითხთან დაკავშირებით დაბარება. აქ პასუხი მარტივია, უბრალოდ გამოძიება დაწყებული იყო გასულ წელს და გამოძიება მივიდა იმ კონდიციამდე, რომ აუცილებელი და გარდაუვალი გახდა პრეზიდენტის დაკითხვა მოწმის სახით ამ ეტაპზე. ეს არის ბუნებრივი და ნორმალური პროცესი ვინაიდან პროკურატურაში საჭიროდ ჩათვალეს დაეკითხათ ერთდროულად 10 საკითხზე ვიდრე 10-ჯერ გამოეძახებინათ. მე მგონი ეს ნორმალურია და პირიქით მათთვის არის ხელსაყრელი. ეს გამოხატულებაა გარკვეული პატივისცემისა ინსტიტუტებისადმი, რომ უბრალოდ 10-ჯერ არ დაიბარეს”, – განაცხადა ღარიბაშვილმა.
საქართველოს ყოფილი პრეზიდენტი მიხეილ სააკაშვილი საქართველოს მთავარ პროკურატურაში, დღეს, 13:00 საათზეა დაბარებული.
27.03.14
