საქართველოში ამერიკის ელჩის მოვალეობის შემსრულებლის ბრიჯიტ ბრინკის განცხადებით, აშშ-ის პრეზიდენტის, ბარაქ ობამას კომენტარი შეეხებოდა იმ გარემოებას, რომ ამ ეტაპზე საქართველოს ამოცანაა, გაწევრიანების სამოქმედო გეგმა მიიღოს და არა – ახლავე გახდეს ნატო-ს წევრი.
ამის შესახებ ბრიჯიტ ბრინკმა ჟურნალისტებთან საუბარში, ბარაკ ობამას განცხადების კომენტირებისას აღნიშნა. ბრიჯიტ ბრინკის თქმით, ამერიკის შეერთებული შტატები მტკიცედ უჭერს მხარს საქართველოს ევროატლანტიკურ ინტეგრაციას, მის გაწევრიანებას ევროატლანტიკურ სტრუქტურებში, მათ შორის, ნატო-ში.
“ამერიკის შეერთებული შტატები ასევე მხარს უჭერს იმ რეფორმების გატარებას, რომელიც საჭიროა ამ მიზნის მისაღწევად. ნება მიბოძეთ მოგახსენოთ, რომ პრეზიდენტის კომენტარი შეეხებოდა იმ გარემოებას, რომ ამ წუთას, ამ ეტაპზე საქართველოს ამოცანაა, მიიღოს გაწევრიანების სამოქმედო გეგმა და არა ამ წუთასვე გახდეს ნატო-ს წევრი. ამ საკითხს ნატო-ს სამიტზე განიხილავენ მიმდინარე წლის მიწურულს და ალიანსი აუცილებლად განიხილავს MAP-ის მინიჭების საკითხს. ნატო-ს კარი ღიაა მასში გაწევრიანების ყველა მსურველისთვის”, – განაცხადა ბრიჯიტ ბრინკმა.
ორი დღის წინ, აშშ-ის პრეზიდენტმა ბარაქ ობამამ ბრიუსელში განაცხადა, რომ ნატოს დაუყოვნებელი გაფართოების გეგმა დღის წესრიგში არ დგას.
“არც უკრაინა და არც საქართველო ამჟამად არ დგანან ნატოში გაწევრიანების გზაზე. არ ყოფილა და არ არის ნატოს დაუყოვნებელი გაფართოების გეგმა”, – აღნიშნა აშშ-ის პრეზიდენტმა ამერიკა-ევროკავშირის სამიტთან დაკავშირებით გამართულ პრესკონფერენციაზე.
28.03.14
