ეკონომიკის მინისტრის გიორგი კვირიკაშვილის განცხადებით, მთავრობა ქმნის ახალ საფინანსო ინსტიტუტს – სახელმწიფო ბანკს, სადაც გაერთიანდება სხვადასხვა სახელმწიფო –საინვესტიციო ფონდები. მინისტრის განცხადებით ამ ინსტიტუტმა უნდა დააფინანსოს განვითარების გრძელვადიანი პროექტები, სადაც გრძლევადიანი კაპიტალია საჭირო, რა ტიპის პროქტებსაც არსებული კომერციული საბანკო სისტემა, როგორც წესი, არ აფინანსებს.
”თბილისი თაიმსი” დაინტერესდა, თუ როგორ აფასებენ ეკონომიკის ექსპერტები მთავრობის ახალ ინიციატივას.
სამი გამოკითხული ექსპერტიდან ორი მთავრობის ინიციატივას უარყოფითად აფასებს.
აკაკი ცომაია: „ესეთი ბანკი არსებობდა 90-იან წლებში და რეალურად, მაშინ ეს ბანკი ასრულებდა საბიუჯეტო ფულის გარეცხვის ფუნქციას, ანუ გარკვეული რაოდენობის თანხა გადადიოდა ამ ბანკში, ხდებოდა კრედიტების გაცემა და შემდგომ, მოგეხსენებათ ეს კრედიტები არ ბრუნდებოდა. ზოგადად სახელმწიფო ბანკის ფორმირებისას ბიუჯეტი ნაკლებად ექვემდებარება კონტროლს, ეს აჩენს კორუფციის ახალ გზებს, გარდა ამისა სახელმწიფო ბიუჯეტი აგებულია დეფიციტის პირობებში და ნასესხები თანხით ბანკის შექმნის იდეა ნამდვილად არ მხიბლავს. სახელმწიფო ბანკის შექმნა აბსურდულია და არამგონია მას რეალური საფუძველი ქონდეს, შეუძლებელია შექმნა ბანკი, რომლის წყაროსაც წარმოადგენს მოზიდული ფინანსური რესურსები, გარდა ამისა ის მოსაზრება, რომ სახელმწიფო ბანკი უფრო მეტად შეძლებს სესხების გაცემას ისეთ სფეროში, რომელიც მომგებიანი იქნება და ხელს შეუწყობს ეკონომიკის განვითარებას არის არასწორი. მე ამ ბანკის შექმნაში დადებითს ვერაფერს ვხედავ. შესაძლებელია სახელმწიფო ინსტიტუციებში სხვანაირად ფიქრობენ და მიაჩნიათ, რომ ეს ბანკი შეძლებს ეკონომიკის გაჯანსაღებასა და ეს პროექტი იქნება მომგებიანი, რასაც მე, ბუნებრივია. არ ვეთანხმები.“
ალექსანდრე თვალჭრელიძე: „ჩემი აზრით საჭიროა ამის გაკეთება, ეს არის ისეთივე ინსტიტუტი, როგორიცაა ევროპის რეკონსტრუქციისა და განვითარების ბანკი, აზიის განვითარების ბანკი და ა.შ ეს, როგორც წესი, სახელმწიფო დაწესებულებებია და ემსახურება იმას, რომ ყველაფერი თავმოყრილი იყოს ერთი ინსტიტუციის ქვეშ. ჩვენ გვაქვს საინვესტიცციო ფონდი, თანადაფინანსების ფონდი და ა.შ ეს ყველაფერი უნდა იყოს ერთმანეთთან შეწყობილი და ერთი გუნდის ქვეს, ამიტომ მე მეჩვენება, რომ სახელმწიფო ბანკის შექმნის გადაწყვეტილება სწორი იყო. ამ ინსტიტუციის შექმნას არ მოყვება არანაირი უარყოფითი შედეგი, პირიქით, ყველა საინვესტიციო პროექტი იქნება შეთანხმებული და მოხდება ამ პროექტების თანადაფინანსება, ამასთანავე საფინანსო რესურსი უფრო დიდი იქნება, ვიდრე ცალ-ცალკე დაყოფილ ფონდებში.“
ემზარ ჯგერენაია: „სახელმწიფო ბანკი არის მსხვილი საფინანსო სახელმწიფო ორგანიზაცია, რომლის დანიშნულებაა მსხვილი საინვესტიციო პროექტების დაფინანსება ან ამ პროექტებისთვის კაპიტალის მოზიდვა. 90-იან წლებში საქართველოში არსებობდა მსგავსი ბანკი, იყო ასევე რუსეთში, ბელორუსიაში, ყაზახეთში, ჩინეთში სადაც დღემდე შემორჩა. დღესდღეობით, საქართველოში განვითარების ბანკის შექმნის აუცლებლობას მე ვერ ვხედავ, მცირე რესურსებით ამ ბანკის შექმნა იქნება ზედმეტი დანახარჯი.“
25.04.14
ნინა პირტახია