რუსთავის სამარშრუტო ტაქსების ტენდერში გამარჯვებული კომპანიის დირექტორი მამუკა მუმლაძის მტკიცებით, ნაკისრ ვალდებულებებს , საკონკურსო პირობებით გათვალისწინებულ ვადაში, 25 მაისამდე შეასრულებენ. როგორც მამუკა მუმლაძემ ჟურნალისტებს პრემიერ-მინისტრ ირაკლი ღარიბაშვილის დღევანდელ მოწოდებაზე საპასუხოდ განუცხადა, კომპანიას საკონკურსო პირობების თანახმად, ნაკისრი ვალდებულებების შესასრულებლად ვადა 25 მაისამდე აქვს. “კომპანიას შვიდ აპრილს გადმოეცა შესაბამისი ნებართვა. სწორედ 7 აპრილიდან დაიწყო ვალდებულებების შესრულება, საკონკურსო პირობების თანახმად კი, კომპანიას 25 მაისამდე აქვს ვადა, რომ ყველა ნაკისრი ვალდებულება შეასრულოს. ჩვენ გვაქვს გაწერილი გეგმა, რომელიც საკონკურსო პირობებით აღებული ვალდებულებების შესრულებას 24 მაისის ჩათვლით ითვალისწინებს, რასაც კომპანია შეასრულებს წარმატებულად და თქვენ ამის მოწმე გახდებით. ჩვენ გვეყოფა დრო 25 მაისამდე, რომ ნაკისრი ვალდებულებები სრულად შევასრულოთ”, – განაცხადა მუმლაძემ. მისივე განმარტებით, მძღოლების ნაწილთან შეთანხმება უკვე მიღწეულია, დარჩენილ ნაწილთან შესაბამისი საკითხის გადაწყვეტა კი სწორედ აღნიშნულ ვადამდეა გათვალისწინებული. “კომპანია აცხადებს, რომ ყველა ის ადამიანი, რომელიც აღნიშნულ მარშრუტზე კონკურსამდე მუშაობდა, აუცილებლად დასაქმდება და მათ ექნებათ სამუშაო”, – აღნიშნა “ინტერტრანსის” დირექტორმა. რაც შეეხება ქვემო ქვართლის გუბერნატორის განცხადებას, რომ კომპანიის მხრიდან მძღოლების მისამართით ადგილი აქვს “გაუგებარ შეთავაზებებს”, მუმლაძის მტკიცებით, შეთავაზებები არა გაუგებარი, არამედ განსხვავებულია იქიდან გამომდინარე, რომ “მარშრუტები არის სხვადასხვა”. ამასთან, დღეს საქართველოს პრემიერ-მინისტრი ირაკლი ღარიბაშვილი რუსთავის სამარშრუტო ტაქსების ტენდერში გამარჯვებულ კომპანია “ინტერტრანსს” ნაკისრი ვალდებულებების დროულად შესრულებისა და ყველა იმ მძღოლის დროული დასაქმებისკენ მოუწოდებს, რომლებიც რუსთავი-თბილისის სამაშრუტო ხაზზე აქამდეც მუშაობდნენ. ღარიბაშვილმა შესაბამისი განცხადება რუსთავის გუბერნიის შენობაში, ქვემო ქართლის გუბერნატორ გიორგი მღებრიშვილსა და ქალაქის ადმინისტრაციის წარმოადგენელებთან შეხვედრაზე გააკეთა და კომპანიის მიერ ნაკისრი ვალდებულებების შეუსრულებელობის შემთხვევაში, მათ “ინტერტრანსის” წინააღმდეგ “კანონის შესაბამისი მოქმედებისკენ” მოუწოდა. 05.05.14
