აფხაზეთში განვითარებულ მოვლენებს თითოეული ქართველი დიდი ინტერესით ადევნებს თვალს. აფხაზეთის ე.წ. ოპოზიციამ დე ფაქტო პრეზიდენტის, ალექსანდრე ანქვაბის გადადგომა მოითხოვა, ანქვაბი მოულოდნელად გადადგა. რა თქმა უნდა, საქართველოსთვის მნიშვნელოვანია თუ როგორ დასრულდება მიმდინარე მოვლენები.
როგორ შეიძლება განვითარდეს სიტუაცია აფხაზეთში, რამდენად დაცულია ეთნიკურად ქართველი მოსახლეობის უფლებები, აღდგება თუ არა აფხაზეთთან სარკინინიგზო მიმისვლა ამ საკითხებზე ,,თბილისი თაიმსს“ შერიგებისა და სამოქალაქო თანასწორობის საკითხებში სახელმწიფო მინისტრი პაატა ზაქარეიშვილი ესაუბრა.
როგორ შეაფასებდით აფხაზეშთი განვითარებულ მოვლენებს და რა მექანიზმებს იყენებთ, რა კეთდება ეთნიკურად ქართული მოსახლეობის უფლებების დასაცავად?
– ვფიქრობ, რაც მოხდა, რეალურად იმის შედეგია, რომ ანქვაბი და მისი მმართველობის ფორმა ოპოზიციისთვის დიდი ხანია, მიუღებელი იყო. ამასთან, ანქვაბმა მოსახლეობის მოლოდინიც ვერ გაამართლა და ამან ოპოზიცია გააძლიერა. ოპოზიციამ შეიძლება ითქვას, უკრაინაში სიტუაციის მეტ-ნაკლებად დალაგებისთანავე ფაქტის წინაშე დააყენა და აჩვენა, რომ მეტს აღარ მოითმენდა. არ გამოვრიცხავ, რომ სოხუმში მოვლენების ამგვარად განვითარება რუსეთის ინტერესებში არ იყო, თუმცა, პროცესებში მისი ჩართულობა დღეს გარდაუვალი აღმოჩნდა.
სოხუმში ეხლა მთავარი კითხვა არის ის, თუ რამდენად წავა ახალი დე ფაქტო ხელისუფლება რუსეთთან იმ დათმობებზე, რომლებზეც ანქვაბი არ წავიდა, მათ შორის არის მიწასა და უძრავ ქონებაზე საკუთრების უფლება.
– რაც შეეხება, გალის რაიონში მცხოვრები მოსახლეობის დაცვას, ამჟამად აფხაზეთის ტერიტორიიდან ამ მოსახლეობის გამოძევების მცდელობის ნიშნები არ ჩანს. მართალია, იქ არსებობს პოზიციები, რომ გალისა და ოჩამჩირის რაიონებში ე.წ. პასპორტების გაცემის პროცედურა უნდა გადაიხედოს, მაგრამ კონკრეტული ნაბიჯები არ გადადგმულა. თუმცა, ეს არ არის მათ გამოძევებასთან პირდაპირ კავშირში. ჯერჯერობით, იშვიათად თუ ვნახავთ პირებს, რომლებიც ე.წ. პასპორტების ჩამორთმევის კონკრეტულ ფაქებზე საუბრობენ. მიმაჩნია, რომ ამ თემაზე არა საჯარო განცხცადებების, არამედ კონკრეტულ ფაქტებზე რეაგირებაა საჭირო და ჩვენ შესაბამისად ვმოქმედებთ.
როგორ ვარაუდობთ აფხაზეთში მოვლენების განვითარებას?
– გადადგომის შესახებ მოულოდნელი გადაწყვეტილების შემდეგ ანქვაბის მიმართ აფხაზურ საზოგადოებაში გარკვეული სიმპათიებიც კი შეინიშნება. არ არის გამორიცხული, მისი გუნდიდან ოპოზიციისთვის სერიოზული კონკურენტი გამოიკვეთოს. ვნახოთ, ეს ე.წ. არჩევნები რა ვითარებაში ჩაივლის და რა შედეგით დასრულდება. ასე რომ, სოხუმში ბრძოლა ჯერ კიდევ წინაა. ნებისმიერ შემთხვევაში საქართველოს ხელისუფლებას უნდა ჰქონდეს კონტაქტი იმ ძალასთან, რომლის ხელშიც აღმოჩნდება რეალური ძალაუფლება, რათა ურთიერთობის დალაგების შანსი მოგვეცეს.
აფხაზეთთან სარკინინიგზო მიმისვლის თემა წინ ბიძინა ივანიშვილმა წამოსწია,სერიოზული დავა მიმდინარეობდა ამ საკითხთან დაკავშირებით. პოლიტიკოსების,საზოგადოების მოსაზრება ორად გაიყო,თქვენი აზრით, რამ შეუწყო ხელი ამ თემის წამოწევას,შემდეგ კი ისევ უკანა პლანზე გადანაცვლებას?აფხაზეთთან სარკინიგზო მიმოსვლის აღდგენა ნიშნავს თუ არა აფხაზეთის,როგორც დამოუკიდებელი სახელმწიფოს აღიარებას?
– რუსეთთან სარკინიგზო ხაზის აფხაზეთის მონაკვეთის აღდგენასთან დაკავშირებით დაახლოებით ერთი წლის წინ ნათლად დაფიქსირდა პოზიციები და მას შემდეგ არაფერი შეცვლილა. რაც შეეხება იმას, ნიშნავს თუ არა ამ მონაკვეთზე მიმოსვლის აღდგენა აფხაზეთის დამოუკიდებელ სახელმწიფოდ აღიარებას, აქ პასუხი ძალიან მარტივია – რა თქმა უნდა, არა.
05.06.14
ლანა წურწუმია
