საქართველოს კათოლიკოს-პატრიარქმა ჯორჯ ბაირონის შთამომავლები მიიღო. სრულიად საქართველოს კათოლიკოს-პატრიარქთან შეხვედრაზე ლორდ ბაირონის საერთაშორისო კონფერენციის მონაწილეები, ასევე ლორდ ბაირონის შთამომავლები იმყოფებოდნენ. კათოლიკოს-პატრიარქმა ისინი დალოცა და საქართველოს მართლმადიდებელი ეკლესიის სახელით მიესალმა.
“გულითადად მოგესალმებით საქართველოს მართლმადიდებელი ეკლესიის სახელით, ჩვენ მოხარული ვართ, რომ საქართველოში ბაირონის დღეები დღეს იწყება. საქართველოში, ისევე როგორც მთელ მსოფლიოში კარგად იცნობენ ბაირონს. ჩვენთვის ცნობილია მისი მოღვაწეობა და იდეები. გულითადად მივესალმებით ბაირონის შთამომავლებს. ჩვენ ყველაფერს ვაკეთებთ, რომ ბაირონის სახელი ცნობილი იყოს საზოგადოებაში”, – განაცხადა სრულიად საქართველოს კათოლიკოს-პატრიარქმა.
შეხვედრას ლორდ ბაირონის შთამომავალი, მე-13 ლორდი ბაირონი მეუღლესთან ერთად, ასევე ბაირონის ქალიშვილის შთამომავალი გრაფი ლიტონი მეუღლესთან ერთად ესწრებოდნენ. გრაფი ლიტონი ლორდთა პალატის წევრია.
შეხვედრაზე საქართველოში ჯორჯ ბაირონის საზოგადოების ხელმძღვანელმა პროფესორმა ინესა მერაბაშვილმა განაცხადა, დღეს გაიხსნება ბაირონის მე-40 საერთაშორისო კონფერენცია, რომელსაც ყოველწლიურად ბაირონის საერთაშორისო საზოგადოება მართავს. ეს კონფერენცია წელს პირველად თბილისში ტარდება. მასში მსფოლიოს 20 ქვეყნის 100-მდე დელეგატი მონაწილეობს.
ინესა მერაბაშვილმა საუბრისას აღნიშნა, რომ ლორდ ბაირონს 21 წლის ასაკში ჰქონდა გეგმა, რომლის მიხედითაც მას უნდა ემოგზაურა აღმოსავლეთ ქვეყნებში, მათ შორის საქართველოში, თუმცა მან ეს სურვილი ვერ აისრულა. მისივე თქმით, ბაირონის შთამომავლები, რომლებიც საქართველოში იმყოფებიან და კონფერენციის სხვა მონაწილეები შეძლებენ აასრულონ ბაირონის ეს სურვილი.
როგორც ჟურნალისტებთან საუბრისას ინესა მერაბაშვილმა განაცხადა, კონფერენცია ოთხდღიანი იქნება. მისი თემაა: ბაირონი დედანსა და თარგამნაში. ოთხდღიანი კონფერენციის შემდეგ, კონფერენციის სტუმრები ესტუმრებიან კახეთს, მცხეთასა და გორს.
ჟურნალისტებთან საუბრისას ბაირონის შთამომავალმა მე-13 ლორდმა ბაირონმა აღნიშნა, რომ საქართველო არის ძალიან ლამაზი და მიმზიდველი ქვეყანა.
23.06.14
