ქართული უნივერსიტეტების სტუდენტები წელს პირველად, მონაწილეობას მიიღებენ ბიზნეს ქეისების საერთაშორისო შეჯიბრში, რომელიც 2014 წლის დეკემბერში აზერბაიჯანში ჩატარდება.
შესაბამის მემორანდუმს საქართველოს განათლებისა და მეცნიერების სამინისტროს, ,,ბრითიშ ამერიქან ტობაკო ჯორჯია ლიმითედს (BAT)“, ამერიკული განათლების აზერბაიჯანულ ალუმნი ასოციაციას (AAA), თბილისის სახელმწიფო უნივერსიტეტს, კავკასიის უნივერსიტეტს, თავისუფალ უნივერსიტეტს, ქართულ ამერიკულ უნივერსიტეტსა და შავი ზღვის საერთაშორისო უნივერსიტეტს შორის დღეს მოეწერა ხელი.
მემორანდუმის ფარგლებში, პირველად საქართველოს ორი გამარჯვებული უნივერსიტეტის გუნდი, ბრითიშ ამერიქან ტობაკოს მხარდაჭერით, მონაწილეობას მიიღებს ბიზნეს ქეისების საერთაშორისო შეჯიბრში. გარდა საერთაშორისო კონკურსში მონაწილეობის გამოცდილებისა, გამარჯვებული გუნდები ფულადი პრიზებით და სერთიფიკატებით დაჯილდოვდებიან.
შეჯიბრში ეკონომიკისა და ბიზნესის ბაკალავრიატის დამამთავრებელი კურსის ან მაგისტრატურის დონიდან შერჩეული სტუდენტები მიიღებენ მონაწილეობას.
შეჯიბრის პირველი ეტაპი საქართველოში გაიმართება და მასში ხუთი უნივერსიტეტის – თსუ, CU, FU, GAU და IBSU-ს გუნდები ჩაერთვებიან. მათგან ორი გამარჯვებული გუნდი ბაქოში გაემგზავრება. სამინისტრო პასუხისმგებლობას იღებს გაწიოს ნებისმიერი საინფორმაციო და ტექნიკური მხარდაჭერა საჭიროებისამებრ, ხოლო ბრითიშ ამერიქან ტობაკო ბაქოში გამარჯვებული გუნდების გამგზავრებას უზრუნველყოფს.
საქართველოს წარმომადგენელთა მონაწილეობა ასეთი დონის კონკურსში ძალზე მნიშვნელოვანია და ხელს შეუწყობს ქართველი სტუდენტების შესაძლებლობების გამოვლენას, ამაღლებს სტუდენტთა მოტივაციას, გაზრდის მათი მომზადების დონეს და არის მათი პროფესიულ ზრდისა და მომავალი წარმატების გარანტი.
25.06.14
