გაიმართა ფორუმი სახელწოდებით – „შშმ პირთა ადვოკატირება ბიზნეს სექტორში მათი დასაქმების მიზნით“. ღონისძიება ჩატარდა არასამთავრობო ორგანიზაცია „განსხვავებული უნარების მქონე პირთა გაერთიანების ინიციატივითა და ახალგაზრდა ანალიტიკოსთა და მეცნიერთა დარბაზ დოქტრინას ეკონომიკური კვლევებისა და კონსულტაციების ცენტრ Doctrina Business Review-ს მხარდაჭერით.
ღონისძიების ფარგლებში განხორციელდა სპეციალური კვლევის პირელადი შედეგების პრეზენტირება, რომელმაც წარმოაჩინა შშმ პირებისთვის ბიზნეს სექტორში დასაქმებისთვის ადაპტირებული გარემოს და ინფრასტრუქტურის შექმნის პრობლემები.
კვლევის ფარგლებში მოხდა მსხვილი ბიზნეს კომპანიების გამოკითხვა.
კვლევის შედეგად დადგინდა:
გამოკითხულთა 27% მიიჩნევს, რომ მას აქვს საჭირო ინფრასტრუქტურა სამსახურში შშმ პირების ადაპტირებისთვის, 18% თვლის, რომ არ აქვთ, ხოლო 55%-მა არ იცის აქვთ თუ არა საერთოდ ასეთი შესაძლებლობა, რაც სავარაუდოდ საკითხისადმი ამ უკანასკნელთა დაუინტერესებლობით აიხსნება.
გაურკვევლობის მაღალი დონე დაფიქსირდა ასევე ისეთ საკითხებზე, როგორიცაა შშმ პირებისთვის სათანადო პირობების შექმნა კომპანიის ხარჯებით. შეკითხვაზე, მზად ხართ თუ არა შშმ პირებს მოუწყო ადაპტირებული გარემო საკუთარი სახსრებით, გამოკითხულთა 56%-მა უპასუხა რომ არ იცის, 33%განაცხადა თანხმობა, ხოლო უარყოფითი პასუხი დააფიქსირა 11%-მა.
თუმცა, გამოკითხულთა 86% აცხადებს, რომ მზად არის შეუქმნას შშმ პირებს შესაბამისი გარემო თავისი სახსრებით, თუკი სახელმწიფოს მხრიდან იქნება ფინანსური მხარდაჭერა და თანამონაწილეობა.
გამოკითხულთა 46% მიიჩნევს, რომ სხვა თანაბარ პირობებში სამსახურში აყვანისას უპირატესობას შშმ პირს მიანიჭებდა, ხოლო 45%-მა ამ კითხვაზე უარყოფითი პასუხი გასცა.
გამოკითხულთა უმრავლესობა, 64% მიიჩნევს, რომ თუკი სახელმწიფო შშმ პირების დასაქმებასთან დაკავშირებით დააწესებდა კომპანიებისთვის გარკვეულ მიზნობრივ შეღავათებს, ეს მნიშვნელოვანი მასტიმულირებელი ფაქტორი გახდებოდა კერძო სექტორში შშმ პირების დასაქმებისთვის.
ფორუმზე განიხილებოდა წინადადებები და რეკომენდაციები, რომელიც შშმ პირების დასაქმებისთვის სათანადო საკანონმდებლო ცვლილებების განხორციელებასა და ცვლილებების განხორციელებას მოიაზრებდა.
ამ ეტაპზე შემუშავდა შემდეგი სახის რეკომენდაციები:
· კერძო კომპანიებში შშმ პირების დასაქმებისთვის საჭირო გარემოს უზრუნველსაყოფად გასაწევი სამუშაოსთვის საჭირო ფინანსური რესურსები სახელმწიფომ გამოათავისუფლოს ამ კომპანიის მიერ გადასახდელი სახელმწიფო გადასახადებისგან.
· შშმ პირებისთვის 1000 ლარამდე შრომის ანაზღაურება განთავისუფლდეს დაბეგრვისგან.
· სახელმწიფო დაწესებულებებში, სახელმწიფო სასწავლო და საგანმანათლებლო დაწესებულებებში შშმ პირებისთვის ადაპტირებული გარემო შეიქმნას სრული სახელმწიფო დაფინანსებითა და პასუხისმგებლობით.
· უმაღლეს სასწავლებლებში მაგისტრატურის და დოქტრორანტურის საფეხურზე სწავლება შშმ პირებისთვის დაფინანსდეს სახელმწიფოსგან სრულად, ისევე როგორც ეს ხდება ნებაყოფლობით სამხედრო სამსახურ მოხდილი პირებისთვის.
· არსებითად გაიზარდოს შშმ პირებისთვის უმაღლესი და პროფესიული განათლების დაფინანსების მოცულობა.
11.07.14
