საქართველოს გარემოსა და ბუნებრივი რესურსების დაცვის მინისტრის მოადგილე თეიმურაზ მურღულია ოფიციალური ვიზიტით საფრანგეთში გაემგზავრა.
როგორც “თბილისი თაიომსს” სამინისტროდან აცნობეს, საფრანგეთის დედაქალაქ პარიზში საწვავის ეკონომიის გლობალური ინიციატივის სიმპოზიუმი (GFEI Fuel Economy Accelerator Symposium) იმართება. სიმპოზიუმი მიზნად ისახავს ქვეყნებისთვის საავტომობილო საწვავის ეკონომიის მიმართულებით ეფექტური პოლიტიკის შემუშავების ხელშეწყობას.
შეხვედრა საფრანგეთის მთავრობის ფინანსური მხარდაჭერით ტარდება, რომელსაც სხვადასხვა ქვეყნების მთავრობების, არასამთავრობო ორგანიზაციებისა და ბიზნეს სექტორის წარმომადგენლები ესწრებიან. თეიმურაზ მურღულია შეხვედრის მონაწილეებს საწვავის ეკონომიის თვალსაზრისით საქართველოში არსებულ მდგომარეობას, ქვეყნის წინაშე არსებულ გამოწვევებსა და გამოცდილებას გააცნობს. აღნიშნულ სიმპოზიუმში მონაწილეობა საქართველოს საშუალებას მისცემს, საწვავის ეკონომიის გაუმჯობესების მიმართულებით გაიზიაროს სხვადასხვა ქვეყნების გამოცდილება, რაც ხელს შეუწყობს, ამ მიმართულებით სამომავლო პოლიტიკის შემუშავებას. საქართველო საწვავის ეკონომიის გლობალურ ინიციატივასთან (GFEI) 2011 წლიდან თანამშრომლობს.
საწვავის ეკონომიის გლობალური ინიციატივა (GFEI) სხვადასხვა ორგანიზაციების პარტნიორობას წარმოადგენს, რომლებიც საავტომობილო საწვავის ეკონომიის, ეროვნულ და საერთაშოირისო დონეზე სათბურის გაზების გამოყოფის შემცირების, ენერგოუსაფრთხოების უზრუნველყოფის და ჰაერის დაბინძურების შემცირების სფეროებში თანამშრომლობენ.
05.09.14
