ჩუღურეთის მაჟორიტარი დეპუტატის რიმა ბერაძის ინიციატივით, უზნაძის ქუჩის #2-4-6 კორპუსების მაცხოვრებლებს მალე სარდაფებში არსებული ანტისანიტარიის პრობლემა მოეხსნებათ.
როგორც აღნიშნულ მისამართზე მცხოვრები მოსახლეობა აცხადებს, ათეულობით წლებია სარდაფებში წყალი გროვდება, არის შემთხვევები, როდესაც კორპუსების საძირკველში ფეკალური მასები ჩაედინება, თუმცა უამრავი წერილისა თუ საჩივრის მიუხედავად, წინა ხელისუფლებიდან ადგილზე არავინ მისულა და შესაბამისად, არც პრობლემა მოგვარებულა.
უზნაძის ქუჩის # 2-ში მცხოვრები ნანა ჯაფარიძის თქმით, რიმა ბერაძე პირველი მაჟორიტარი დეპუტატია, რომელიც მხოლოდ წინასაარჩევნო კამპანიით არ შემოიფარგლა და პრობლემას პირადად გაეცნო.
ჩუღურეთის რაიონის მაჟორიტარი დეპუტატი აღნიშნულ მისამართზე არსებული ვითარებით არჩევნებამდე დაინტერესდა და საკრებულოს ურბანული დაგეგმარებისა და საქალაქო მეურნეობის კომისიის სხდომაზე მოწვეული წყლის კომპანიის წარმომადგენლებს პირველ რიგში უზნაძის ქუჩის პრობლემების გადაჭრა სთხოვა.
როგორც მოგვიანებით გაირკვა, ვითარება კომპლექსურ შესწავლას ითვალისწინებს, რის გამოც, რიმა ბერაძემ ვითარების დეტალურად გასაცნობად ადგილზე ჩუღურეთის გამგეობის, მერიის კეთილმოწყობის სამსახურისა და კომპანია ,,GWP“-ს წარმომადგენლები მიიწვია.
საკრებულოს უმრავლესობის ფრაქციის ,,ქართული ოცნება – დემოკრატიული საქართველო“ ლიდერის თქმით, შეიქმნება სპეციალური კომისია, რომელშიც ჩაერთვებიან გამოცდილი სპეციალისტები და მათ მიერ დაიდება დასკვნა, სადაც დეტალურად იქნება ასახული აღნიშნული პრობლემის წარმოშობის მიზეზები.
როგორც კომპანია ,,GWP“-ს ტექნიკური დირექტორის მოადგილემ აღნიშნა, სარდაფებში წყლის ჩადინება ძირითადად მტკვრის დონის მატებას ემთხვევა, ასევე პრობლემას ქმნის სადრენაჟე სისტემების გაუმართავი მუშაობა.
ომარ გოცირიძის თქმით, ამ კორპუსებისა და მისი მიმდებარე ტერიტორიების მდგომარეობა გეოლოგიურად იქნება შესწავლილი და დასკვნის შემდგომ ჩატარდება ყველა ის გარკვეული სამუშაოები, რაც აუცილებელი იქნება ისტორიული ძეგლების გადასარჩენად.
კომისიას დედაქალაქის მერიის კეთილმოწყობის სამსახური უხელმძღვანელებს.
როგორც დედაქალაქის მთავრობის წარმომადგენელმა ზურაბ მურჯიკნელმა აღნიშნა, ანალოგიური პრობლემები მტკვრის ორივე სანაპიროზე არსებობს და კეთილმოწყობის სამსახურის ახალი ხელმძღვანელობა მათ მოგვარებას ეტაპორივად ახორციელებს.
ჩუღურეთის გამგებლის ზურაბ ჩიკვილაძის თქმით, გამგეობა მოსახლეობას მერიასთან დღესვე გაუწევს შუამდგომლობას და სავარაუდოდ წლის ბოლომდე მოხდება სადრენაჟე სისტემის ინფრასტრუქტურული აღდგენა.
ვინაიდან უზნაძის ქუჩაზე მდებარე კორპუსები ისტორიული ძეგლის სტატუსს ატარებს, ჩუღურეთის მაჟორიტარმა დეპუტატმა კულტურისა და ძეგლთა დაცვის სამინისტროსაც მიმართა.
რიმა ბერაძის თქმით, იგი თავად გაუწევს მონიტორინგს სამუშაოებს და პირადად განახორციელებს კონტროლს, როგორც სარდაფების, ასევე აღნიშნული კორპუსების სახურავების, სადარბაზოებისა და ლიფტების შეკეთების მიმდინარეობას.
18.09.14
