საქართველოს განათლებისა და მეცნიერების მინისტრმა თამარ სანიკიძემ და მინისტრის მოადგილე ლია გიგაურმა ეროვნულ სასწავლო ოლიმპიადაში და ეროვნულ დონეზე ინფორმატიკის კონკურსში გამარჯვებული მოსწავლეები დააჯილდოვეს.
ღონისძიება განათლების სამინისტროში გაიმართა, სადაც გამარჯვებულები 1000, 700, 500 და 50 ლარის ღირებულების კომპიუტერული ტექნიკის და აქსესუარებისა და წიგნის მაღაზიის სასაჩუქრე ბარათებით, ასევე დიპლომებით დაჯილდოვდნენ.
როგორც თამარ სანიკიძემ ჟურნალისტებთან საუბრისას აღნიშნა, წელს პირველად, სამინისტრომ ინფორმატიკაში კონკურსის ორ ეტაპად ჩატარება უზრუნველყო.
მისივე ინფორმაციით, კიდევ ერთი სიახლე, რომელიც წელს განხორციელდა, ოლიმპიადაში უსინათლო მოსწავლეების ჩართვაა. მათთვის სპეციალური რესურსები შეიქმნა.
“ოლიმპიადაში ჩართულობა ნამდვილად მაღალი იყო, რაც კარგია და მისასალმებელია. ზოგადად, ოლიმპიადა ძალიან მნიშვნელოვანია და ასეთ აქტივობებში მოსწავლეების ჩართვა ყოველთვის მხარდაჭერილი იქნება. გამარჯვებულები, რომლებიც საერთაშორისო ოლიმპიადაში მონაწილეობდნენ არაჩვეულებრივი შედეგებით დაბრუნდნენ”, – აღნიშნა თამარ სანიკიძემ და პედაგოგების თანამონაწილეობის მნიშვნელობაზე გაამახვილა ყურადღება,
თავად გამარჯვებულმა მოსწავლეებმა ჟურნალისტებთან საუბრისას აღნიშნეს, რომ მათ ოლიმპიადაში მონაწილეობამდე ბევრი იმეცადინეს და დიდი გამოცდილება მიიღეს.
X-XII კლასის მოსწავლეებისთვის ეროვნული სასწავლო ოლიმპიადა წელს შემდეგ საგნებში ჩატარდა: ქართული ენა და ლიტერატურა (ქართულენოვანი და არაქართულენოვანი მოსწავლეებისთვის), მათემატიკა, ფიზიკა, ქიმია, ბიოლოგია, გეოგრაფია, ისტორია, უცხოური ენები (ინგლისური, გერმანული, რუსული).
ეროვნულ სასწავლო ოლიმპიადაში ბრაილის შრიფტით დაბეჭდილი მასალებით უსინათლო მოსწავლეებიც მონაწილეობდნენ. პირველად, სამინისტროს მიერ ფასიანი საჩუქრებით საუკეთესო ათეულში გასული მოსწავლეები დაჯილდოვდნენ. ოლიმპიადა ჩატარდა როგორც ქართულ, ასევე სომხურ, აზერბაიჯანულ და რუსულ ენებზე.
ინფორმატიკაში ეროვნული კონურსი ორ ეტაპად სამ ასაკობრივ კატეგორიაში ჩატარდა და მასში მონაწილეობა საჯარო და კერძო სკოლების VII-XII კლასის მოსწავლეებმა მიიღეს. სულ 176 გამარჯვებული გამოვლინდა: I ადგილზე გავიდა 22 მოსწავლე, მეორეზე – 20, მესამეზე – 19. საუკეთესო ათეულში წელს 115 მოსწავლე მოხვდა.
მადლობის სიგელები გადაეცათ სკოლების რეიტინგული სიის I, II და III ადგილზე გასულ სკოლებს (29 სკოლა) და I, II და III ადგილზე გასული მოსწავლეების პედაგოგებს (58 პედაგოგი). შეფასებისა და გამოცდების ეროვნული ცენტრი წამახალისებელ სიგელებს გადასცემს ყველა იმ მოსწავლეს, რომელთაც ოლიმპიადის მე-2 ტურში გაიმარჯვა.
განათლების სამინისტროს ინფორმაციით, ეროვნული სასწავლო ოლიმპიადა 2009 წლიდან ტარდება და მასში ყოველწლიურად საშუალოდ 200 000-მდე მოსწავლე მონაწილეობს.
01.10.14