სტატუსშეჩერებული სტუდენტების საკითხთან დაკავშირებით, განათლებისა და მეცნიერების მინისტრი სტუდენტთა და არასამთავრობო ორგანიზაციების წარმომადგენლებით დაკომპლექტებულ საინიციატივო ჯგუფთან შეხვედრას გამართავს.
ამის შესახებ ნათქვამია საქართველოს განათლებისა და მეცნიერების სამინისტროს განცხადებაში.
როგორც განცხადებაშია აღნიშნული, საქართველოს განათლებისა და მეცნიერების სამინისტროს სტატუსშეჩერებული სტუდენტების საკითხთან დაკავშირებით, არაერთმა სტუდენტმა და სტუდენტური თუ სხვა პროფილის ორგანიზაციამ მიმართა.
“ვინაიდან ამ საკითხის მიმართ ინტერესი დიდია, საქართველოს განათლებისა და მეცნიერების მინისტრი თამარ სანიკიძე დაინტერესებულ სტუდენტთა და არასამთავრობო ორგანიზაციების წარმომადგენლებით დაკომპლექტებულ საინიციატივო ჯგუფთან გამართავს შეხვედრას.
მიმდინარე კვირაში მინისტრი სამუშაო ვიზიტით იმყოფება საზღვარგარეთ. შესაბამისად, აღნიშნული შეხვედრა მომავალ კვირას გაიმართება. შეხვედრის ორგანიზების მიზნით, დაინტერესებულ პირებს შეუძლიათ დაუკავშირდნენ განათლებისა და მეცნიერების სამინისტროს უმაღლესი განათლების განვითარების დეპარტამენტის სტუდენტთა სოციალური ხელშეწყობის სამმართველოს უფროსს ვალერი გობრონიძეს, განათლებისა და მეცნიერების სამინისტროს ცხელ ხაზზე: 2 200 220”, – აღნიშნულია სამინისტროს მიერ გავრცელებულ განცხადებაში.
07.10.14
