საქართველოს სპორტისა და ახალგაზრდობის საქმეთა სამინისტრო “ახალგაზრდული პოლიტიკის განვითარების პროგრამის” ფარგლებში ახორციელებს “საქართველოს ახალგაზრდა ელჩების პროგრამას – იყავი შენი ქვეყნის ახალგაზრდა ელჩი”.
სამინისტროს ინფორმაციით, პროგრამის მთავარ მიზანს წარმოადგენს საზღვარგარეთ მცხოვრებ ახალგაზრდა თანამემამულეებთან ურთიერთობის განვითარება.
19 მაისს მინისტრის ბრძანების საფუძველზე შეიქმნა საკონკურსო კომისია, რომელიც დაკომპლექტებულია საქართველოს სპორტისა და ახალგაზრდობის საქმეთა სამინისტროს, საქართველოს საგარეო საქმეთა სამინისტროსა და დიასპორის საკითხებში საქართველოს სახელმწიფო მინისტრის აპარატის წარმომადგენლებით.
მიმდინარე წლის 22-30 სექტემბერს საკონკურსო კომისიამ ჩაატარა კონკურსის მეორე ეტაპი (გასაუბრება). გასაუბრებისა და კომისიის წევრთა ქულების დაჯამების შედეგად გამოვლინდნენ გამარჯვებულები: 1. ამერიკის შეერთებული შტატები – იოსებ ჟორჟოლიანი; 2. ავსტრია – სალომე სალაძე; 3. გერმანია – მიხეილ სარჯველაძე; 4. დიდი ბრიტანეთი – გიორგი ლომიძე; 5. თურქეთი – თეონა ვარშალომიძე; 6. ლიტვა – სანდრო ვეკუა; 7. პოლონეთი – ქეთევან ფრანგულაიშვილი; 8. საფრანგეთი – ლია ჭიპაშვილი; 9. უკრაინა – მიხეილ გეგეჭკორი; 10. ჩეხეთი – ლაშა ნავერიანი.
კონკურსმა სტარტი 2014 წლის 18 აგვისტოს აიღო. კონკურსში “საქართველოს ახალგაზრდა ელჩების” შესარჩევად მსოფლიოს 10 ქვეყანაში მონაწილეობის უფლება ჰქონდათ მხოლოდ იმ ახალგაზრდებს, რომლებიც ცხოვრობენ შემდეგ ქვეყნებში: 1. ამერიკის შეერთებული შტატები; 2. გერმანიის ფედერაციული რესპუბლიკა; 3. საფრანგეთი; 4. დიდი ბრიტანეთი; 5. ავსტრია; 6. ლიტვა; 7. პოლონეთი; 8. უკრაინა; 9. ჩეხეთი; 10. თურქეთი;
პროექტის საშუალებით იმ ახალგაზრდებს, რომლებიც ცხოვრობენ საზღვარგარეთ, შესაძლებლობა მიეცემათ ერთწლიანი მანდატით გახდნენ “ახალგაზრდა ელჩები” ადგილსამყოფელ ქვეყნებში და მოახდინონ მათი თანატოლი ქართველი და უცხოელი ახალგაზრდების ინფორმირება ჩვენი ქვეყნის ეკონომიკის, განათლების, კულტურის, სპორტის, ახალგაზრდული პოლიტიკისა და ისტორიის შესახებ.
“ახალგაზრდა ელჩების” მთავარი ამოცანა არის იმ კულტურული, საგანმანათლებლო და სპორტული ღონისძიებების განხორციელება, რომელთა მიზანს საქართველოს პოპულარიზაცია წარმოადგენს. ამ პროექტებში მონაწილე ახალგაზრდებისაგან ჩამოყალიბდება საქართველოს უცხოელ ახალგაზრდა მეგობართა ქსელი.
შერჩეულ “ახალგაზრდა ელჩებს”, წინასწარ შედგენილი სამოქმედო გეგმისა და საკუთარი ინიციატივების საფუძველზე, საშუალება მიეცემათ განახორციელონ სხვადასხვა კულტურულ-შემოქმედებითი, სპორტული, საგანმანათლებლო და სხვა სახის პროექტები, რომლებშიც მონაწილეობას მიიღებენ ადგილობრივი ქვეყნის სხვადასხვა ქალაქში მცხოვრები ქართველი და უცხოელი ახალგაზრდები.
კონკურსში მონაწილეობის მიღების უფლება აქვს საქართველოს მოქალაქეს (18-დან 29 წლამდე), რომელიც ცხოვრობს საზღვარგარეთ და ფლობს საქართველოს სახელმწიფო ენას.
კონკურსი ორ ეტაპად ჩატარდა.
15.10.14
