საქართველოს რეგიონული განვითარებისა და ინფრასტრუქტურის მინისტრმა, დავით შავლიაშვილმა ბაქოში შეხვედრები გამართა.
უწყების ინფორმაციით, დავით შავლიაშვილი აზერბაიჯანის ტრანსპორტის მინისტრ ზია მამედოვს და თურქეთის ტრანსპორტის მინისტრ ლუტფი ელვანს შეხვდა.
შეხვედრებზე საუბარი შეეხო მხარეებს შორის ურთიერთობების გაღრმავებასა და ქართულ ინფრასტრუქტურულ პროექტებში აზერბაიჯანული და თურქული კომპანიების ჩართვას.
დავით შავლიაშვილი ბაქოში ორდღიანი ვიზიტით იმყოფება. იგი სიტყვით გამოვიდა საერთაშორისო კონფერენციაზე, “ბაქო-თბილისი-ყარსის სარკინიგზო ხაზის – ისტორიული აბრეშუმის გზის განვითარების ახალი შესაძლებლობები”, რომელშიც მსოფლიოს 30 ქვეყნის დელეგაცია, საერთაშორისო ორგანიზაციები და საფინანსო ინსტიტუტების წარმომადგენლები მონაწილეობდნენ.
სიტყვით გამოსვლის დროს მინისტრმა ისაუბრა საქართველოს სატრანზიტო პოტენციალისა და შესაძლებლობების შესახებ, ყურადღება გაამახვილა ევროპასა და აზიას შორის სატრანსპორტო დერეფნის განვითარების მნიშვნელობაზე და იმ როლზე, რომელიც სატრანსპორტო დერეფანმა ქვეყნებს შორის ვაჭრობისა და ეკონომიკური ურთიერთობების გაღრმავებაში უნდა შეასრულოს.
საერთაშორისო კონფერენციაზე გაიმართა ბაქო-თბილისი-ყარსის სარკინიგზო ხაზის – როგორც ევროპისა და აზიის დამკავშირებელი ეფექტური კვანძის, პროექტის პრეზენტაცია.
“ეს სარკინიგზო ხაზი, რომლის მშენებლობა აზერბაიჯანს, საქართველოსა და თურქეთს შორის გაფორმებული მთავრობათაშორისი შეთანხმების საფუძველზე მიმდინარეობს, ხელს შეუწყობს აზიასა და ევროპას შორის ტვირთბრუნვის გაზრდასა და ცენტრალურ აზიას, შავი ზღვის რეგიონსა და ევროპას შორის სავაჭრო ურთიერთობებს გააუმჯობესებს”, – აცხადებენ სამინისტროში.
საერთაშორისო კონფერენცია – “ბაქო-თბილისი-ყარსის სარკინიგზო ხაზის – ისტორიული აბრეშუმის გზის განვითარების ახალი შესაძლებლობები” დღეს დაიხურება.
17.10.14
