“თბილისობის” დღესასწაულის ფარგლებში საქართველოში უცხოელი სტუმრები ჩამოვლენ, – ამის შესახებ თბილისის მერმა დავით ნარმანიამ დღეს მთავრობის სხდომაზე განაცხადა.
მისივე განცხადებით, უცხოელ სტუმრებთან ერთად თბილისში ასევე ჩამოვა ბრისტოლის მერი, რომელიც დედაქალაქში რამდენიმე დღე დარჩება. დავით ნარმანიას განცხადებით, ბრისტოლის მერი თბილისობის ფარგლებში გამართულ ღონისძიებებში მიიღებს მონაწილეობას და სხვა საინტერესო საკითხებზე იქნება საუბარი. დავით ნარმანიას თქმით, “თბილისობა 2014” ძალიან დატვირთული იქნება სხვადასხვა ღონისძიებებით.
“25-26 ოქტომბერს ჩატარდება ტრადიციული ღონისძიებები რიყესა და მის მიმდებარე ტერიტორიაზე, განსხვავება იქნება იმით, რომ მთელი ქალაქის მასშტაბით გაიშლება ღონისძიებები, ასევე გაკეთდება ადგილობრივი მნიშვნელობის ღონისძიებებიც. დაჯილდოვდებიან საპატიო თბილისელის წოდებით მოქალაქეები. უახლოეს დღეებში კომისია დაასრულებს მუშაობას აღნიშნულ საკითხთან დაკავშირებით და გვექნება ზუსტი სია იმ ადამიანების, ვისაც ეს წოდება გადაეცემა. გარდა საპატიო თბილისელისა, ჩემი ინიციატივით შემოვიღეთ “თბილისზე მზრუნველის” წოდება. არიან ადამიანები, რომლებსაც შესტკივათ დედაქალაქზე გული და აკეთებენ ბევრ რამეს უსასყიდლოდ. ასეთი ადამიანების შრომამ ფუჭად არ უნდა ჩაიაროს და ჩვენ 10-ზე მეტ ადამიანს მივანიჭებთ თბილისზე მზრუნველის წოდებას. ეს იქნება სხვა ადამიანებისთვის სამაგალითო”, – განაცხადა დავით ნარმანიამ.
მისივე განცხადებით, თბილისობის ფარგლებში ასევე ჩატარდება ღვინის ფესტივალიც, დღეიდან კი სატელევიზიო ეთერში გავა რეკლამები, სადაც საზოგადოებას მიეწოდება ინფორმაცია დედაქალაქის რომელ რაიონში რა ღონისძიება იგეგმება.
“მოვუწოდებ თბილისელებს და ჩვენს თანამოქალაქეებს, რომ მიიღონ მონაწილეობა თბილისობაში. სტუმრები იქნებიან როგორც საქართველოდან, ასევე 30-ზე მეტი სტუმარი ჩამოვა ჩვენს დედაქალაქში “თბილისობის” ღონისძიებაზე დასასწრებად”, – განაცხადა დავით ნარმანიამ.
“თბილისობა 2014” 25-26 ოქტომბერს გაიმართება.
22.10.14
