საქართველოს პრემიერ-მინისტრის ირაკლი ღარიბაშვილის და ნატო-ს ახალი გენერალური მდივნის, იენს სტოლტენბერგის შეხვედრა 17 ნოემბერს ბრიუსელში გაიმართება, – ამის შესახებ ჟურნალისტებს საქართველოს საგარეო საქმეთა მინისტრმა, მაია ფანჯიკიძემ მთავრობის ადმინისტრაციაში მთავრობის სხდომის დაწყებამდე განუცხადა.
მისივე თქმით, შეხვედრა შედგება 17 ნოემბერს, როდესაც საქართველოს დელეგაცია, პრემიერის ხელმძღვანელობით, ბრიუსელში გაემგზავრება, რათა შედგეს საქართველო-ევროკავშირის პირველი ასოცირების საბჭო. რაც შეეხება უშუალოდ შეხვედრას, ფანჯიკიძის განცხადებით შეხვედრა 16:00 საათზე არის დანიშნული.
ირაკლი ღარიბაშვილთან შეხვედრის შესახებ ალიანსის გენმდივანმა ბრიუსელში, გერმანიის მარშალის ცენტრში გამოსვლის დროს განაცხადა.
მისი თქმით, საქართველოს მთავრობის თავმჯდომარესთან იმ ყოვლისმომცველი პაკეტის განხილვას აპირებს, რომელიც ნატო-მ საქართველოსთან მიმართებაში უელსის სამიტზე მიიღო.
“ნატო-ს ღია კარის პოლიტიკა ძალიან წარმატებულია. მე ვესწრებოდი ბუქარესტის სამიტს, სადაც ჩვენ საქართველოს შესახებ გადაწყვეტილება მივიღეთ. ახლა ჩემი, როგორც გენერალური მდივნის პასუხისმგებლობაა, რომ ვიზრუნოთ იმ არსებითი პაკეტის განხორციელებაზე, რაზეც შევთანხმდით. საკმაოდ მალე ვაპირებ, რომ შევხვდე საქართველოს პრემიერ-მინისტრს, რათა განვიხილოთ ეს ყოვლისმომცველი პაკეტი”, – განაცხადა ნატოს გენერალურმა მდივანმა.
იენს სტოლტენბერგის განმარტებით, საქართველო ნატო-ს ძლიერი პარტნიორია.
“დამატებით მინდა ხაზი გავუსვა, რომ საქართველო არის ნამდვილად ძლიერი პარტნიორი – ის მონაწილეობს ნატო-ს ძალიან ბევრ ოპერაციაში. საქართველომ ძალიან ღირებული კონტრიბუცია განახორციელა ავღანეთში. ასევე მივესალმები რეფორმებსა და პროგრესს, რასაც საქართველომ მიაღწია, განსაკუთრებით შეიარაღებულ ძალებში”, – აღნიშნა იენს სტოლტენბერგმა.
30.10.14
