საქართველოში მომხდარ სტიქიასთან დაკავშირებით გარემოსა და ბუნებრივი რესურსების დაცვის სამინისტრო განცხადებას ავრცელებს. „დასავლეთ საქართველოს ცალკეულ რეგიონებში გეოლოგიურმა და ჰიდრომეტეოროლოგიურმა მოვლენებმა გარკვეული პრობლემები შექმნა. ოზურგეთში, ძლიერი წვიმის შედეგად წმ. გიორგის ქუჩაზე ახალრეაბილიტირებული გზა დაზიანდა. შესაბამისმა სამსახურებმა გზის გასუფთავება უზრუნველყვეს და მოძრაობა აღდგენილია. ასევე აჭარაში ხულოს მუნიციპალიტეტში თოვლის საფარმა 30 სანტიმეტრს მიაღწია. ნალექის გამო გოდერძის უღელტეხილზე ტრანსპორტის მოძრაობა აიკრძალა. მთელი დღის განმავლობაში მობილიზებული იყო მძიმე ტექნიკა, რომლითაც სოფლებთან დამაკავშირებელი გზების გაწმენდითი სამუშაოები მიმდინარეობდა. ხელვაჩაურის მუნიციპალიტეტში ცენტრალური საავტომობილი გზის სავალ ნაწილზე ადგილი ჰქონდა მეწყრული მასის ჩამოშლას, რის შედეგადაც, რამდენიმე საათის განმავლობაში შეიზღუდა ავტოტრანსპროტის მოძრაობა. ამ დროისთვის, გზა გაწმენდილია და მოძრაობა სრულად აღდგენილია. გარემოსა და ბუნებრივი რესურსების დაცვის სამინისტროს გარემოს ეროვნული სააგენტოს სპეციალისტები ადგილზე იმყოფებიან და 24-საათიან რეჟიმში აწარმოებენ შესაბამის კვლევებს. პროცესების გააქტიურების შემთხვევაში, გეოლოგების მიერ შემუშავებული იქნება რეკომენდაციები, რის საფუძველზეც განხორციელდება პრევენციული ღონისძიებები“,-ნათქვამია სამინისტროს განცხადებაში. 03.11.14
