“უსინათლოთა კავშირის ბაზით, სადაც აღწერილია ადამიანების უნარები და დასაქმების შესაძლებობები დავინტერესებით ადმინისტრაციაში”

საქართველოს პრეზიდენტი გიორგი მარგველაშვილი მზადყოფნას გამოთქვამს, მისმა ადმინისტრაციამ “უსინათლოთა კავშირთან” ითანამშრომლოს.

ამის შესახებ გიორგი მარგველაშვილმა უსინათლოების საერთაშორისო დღესთან დაკავშირებით, უსინათლოთა კავშირის წევრებთან შეხვედრისას განაცხადა.

როგორც პრეზიდენტმა აღნიშნა, რაც ახალი ხელისუფლება მოვიდა, ბევრი აქცენტი გაკეთდა არა მარტო უსინათლო, შეზღუდული უნარების მქონე ადამიანებისთვის, არამედ ზოგადად სოციალური პროექტების მიმართულებით.

“მე მოვისმინე ყველა შეხედულება-მოსაზრება, რაც კონკრეტულად უსინათლო ადამიანების პირობების გაუმჯობესებას ეხება. ამაზე, ბუნებრივია, გავაგრძელებთ მუშაობას”, – განაცხადა გიორგი მარგველაშვილმა.

როგორც პრეზიდენტმა აღნიშნა, დღევანდელ შეხვედრაზე მისთვის საინტერესო იყო ინფორმაცია, რომ არსებობს უსინათლოთა კავშირის ბაზა, სადაც აღწერილია ადამიანების უნარები და დასაქმების შესაძლებობები.

“ასეთი ბაზით დავინტერესდებით ადმინისტრაციაში. თუ არის შესაძლებელი, რომ ვაკანსიები, რომლებიც თანხვედრაშია თქვენი ბაზის ადამიანების უნარებთან ან მათ სამუშაო ინტერსებთან, ჩვენ დავინტერსდებით და აქედანვე შეგვიძლია დავიწყოთ კონკრეტული თანამშრომლობა. ბუნებრივია, ეს არ იქნება აუცილებლად დაკავშირებული უსინათლოთა კავშირთან ან ამ პრობლემატიკასთან, ეს შეიძლება იყო სრულიად სხვა თემა”, – განაცხადა გიორგი მარგველაშვილმა.

პრეზიდენტმა მზადყოფნა გამოთქვა, მომავალი წლიდან უსინათლოთა კავშირთან ერთად განახორციელოს ის პროექტები, რომელიც ამ კავშირს აინტერსებს, ეს იქნება დასაქმება, თუ რაიმე წამოწყების მხარდაჭერა.

საქართველოს პრეზიდენტი დღეს უსინათლოთა კავშირში მეუღლესთან, მაკა ჩიჩუასთან ერთად იმყოფებოდა. საქართველოს პრეზიდენტმა, შეხვედრაზე სიტყვით გამოსვლამდე, უსინათლოთა მიერ დამზადებული ხელნაკეთი ნივთები დაათვალიერა.

13.11.14