ლატვიის პრეზიდენტის საქართველოში ვიზიტში ჩვენ ვხედავთ მეგობრობას და იმ მნიშვნელოვან აქცენტებს, რასაც ჰქვია ჩვენი ქვეყნის ტერიტორიული მთლიანობისა და ევროპული არჩევანის მხარდაჭერა, – ამის შესახებ საქართველოს პრეზიდენტმა გიორგი მარგველაშვილმა ლატვიის პრეზიდენტთან შეხვედრის შემდეგ გამართულ ერთობლივ პრესკონფერენციაზე განაცხადა.
გიორგი მარგველაშვილმა საქართველოს მხარდაჭერისთვის ლატვიელ კოლეგას და ლატვიის სახელმწიფოს მადლობაც გადაუხადა.
“ჩემთვის დიდი პატივია ვუმასპინძლო ლატვიის პრეზიდენტს. უაღრესად მნიშვნელოვანია, რომ ეს ვიზიტი განხორციელდა სწორედ დღეს, მაშინ, როდესაც ჩვენი ქვეყნის წინაშე კიდევ ერთხელ, მწვავედ დადგა საკითხი ჩვენი სახელმწიფობრიობის, სუვერენიტეტისა და მისი განმტკიცების. მაშინ როდესაც რუსეთის ფედერაციამ გადადგა კიდევ ერთი უხეში ნაბიჯი საქართველოს ტერიტორიული მთლიანიბის მიმართ და ოკუპირებულ აფხაზეთთან გააფორმა ე.წ. ხელშეკრულება, რომელსაც ეს ოკუპაცია, ფაქტობრივად, ანექსიის დონემდე მიჰყავს, ლატვიელი კოლეგის ასეთი წარმატებული ვიზიტი ხაზგასასმელია, რადგან მასში ჩვენ ვხედავთ მეგობრობას, იმ მნიშვნელოვან აქცენტებს, რასაც ჰქვია საქართველოს ტერიტორიული მთლიანობის, ჩვენი ევროპული არჩევანის მხარდაჭერა. მინდა მადლიერებით აღვნიშნო ის, რომ ბალტიის ასამბლეა იყო პირველი, ვინც დაგმო ოკუპირებულ აფხაზეთთან ე.წ. ხელშეკრულების გაფორმება”, – განაცხადა გიორგი მარგველაშვილმა.
საქართველოს პრეზიდენტმა ლატვიელ კოლეგას მადლობა იმ რეზოლუციის მიღების გამოც გადაუხადა, რითაც, მისი შეფასებით, “საქართველოს კიდევ უფრო გაუხსნა გზა ევროკავშირში ინტეგრაციის მიმართულებით”.
26.11.14
