სუპერმარკერტების ქსელი „ფურშეტ ჯორჯია“ დეკემბრის თვეში ორი ახალი ფილიალის გახსნას გეგმავს. კომპანიის წარმომადგენლების განცხადებით, ქსელის ახალი ფილიალები დედაქალაქის ორ უბანში, დიღომსა და გლდანში განთავსდება. საერთაშორისო ბრენდი ბოლო პერიოდში საქართველოში აქტიურად ფართოვდება. „ფურშეტ ჯორჯიამ“ სექტემბრის თვეში ფილიალი თემქაზე, პურის ქარხსნის მიმდებარე ტერიტორიაზე გახსნა, ხოლო ოქტომბერში კი სანზონაში, კინო ,,საქართველოს’’ შენობაში.
ქართველმა მომხარებელმა კომპანიის შესახებ ჯერ კიდევ ორი წლის წინ შეიტყო. 2012 წლის 21 ნოემბერს „ფურშეტ ჯორჯია“ საქართველოს ბაზარზე შემოვიდა. კომპანია შემოსვლის დღიდან მაქსიმალურად ორიენტირებულია მომხარებელზე, რომელსაც მუდამ სთავაზობს სხვადასხვა სიახლეს.
კომპანიის მიერ შემოთავაზებული სიახლეები მხოლოდ სუპერმარკეტების ქსელის გაფართოებას არ უკავშირდება, იგი მათ მსოფლიო სტანდარტების თანამედროვე ტექნოლოგიებსა და მომსახურებას სთავაზობს.
„თბილისი თაიმსი“ კომპანიის წარმომადგენლებს დაუკავშირდა, მათ „ფურშეტ ჯორჯიას“ მომსახურების სფეროსა და სუპერმარკეტების ქსელის უპირატესობებზე ისაუბრეს: ,,ჩვენი სუპერმარკეტი ყველა გემოვნებისა და მოთხოვნილების მქონე მომხმარებელს აკმაყოფილებს. კომპანია ახდენს პროდუქციის იმპორტს ევროპიდან, ამასთან ,,ფურშეტ ჯორჯიას’’ ორიენტირს ადგილობრივი წარმოების პროდუქტებიც წარმოადგენს.’’
„ფურშეტ ჯორჯია“ მომხარებლების ყველა ასაკობრივ ჯგუფზეა ორიენტირებული და მათ სპეციალურ ფასდაკლებებს სთავაზობს. სექტემბრის თვეში კომპანიამ აამოქმედა 3%-იანი ფასდაკლების ბარათი პენსიონერებისთვის. მათ ქსელის ნებისმიერ ფილიალში შეუძლიათ აიღონ სპეციალური ბარათი. კომპანიის მონაცემებით კი აღნიშნული ფასდაკლებით უკვე 5 000 – ზე მეტი პენსიონერი სარგებლობს.
„ფურშეტი“ უკრაინული სუპერმარკეტების ქსელს წარმოადგენს, კომპანია ამ ქვეყანაში პირველი ნაციონალური ქსელი იყო, რომელმაც დაარსების დღიდან მომსახურების განსხვავებული სტანდარტები დანერგა. იგი უკრაინაში საცალო ვაჭრობის უმსხვილეს კომპანიებს შორისაა და ევროპის მასშტაბით სწრაფად ფართოვდება.
როგორც კომპანიის წარმომადგენლებმა აღნიშნეს, „ფურშეტ ჯორჯიაში“ პროდუქციის იმპორტი ევროპიდან ხდება, ამასთანავე იგი მომხარებლებს საკუთარი სავაჭრო ნიშნით წარმოებულ საქონელსაც სთავაზობს. სუპერმარკეტების ქსელში ქართველ მყიდველებს შეუძლიათ შეიძინონ „ფურშეტის“ სავაჭრო ნიშნით ნატურალური წვენები, მზესუმზირის ზეთი, კონსერვები, საკონდიტრო ნაწარმი და სხვა.
საკონდიტრო პროდუქტებიდან ტრადიციული ქართული და უკრაინული ტექნოლოგიებით გამომცხვარ უგემრიელესი ნაწარმი გვხვდება. კომპანიის მიზანს საქართველოს ბაზარზე წარმოადგენს მყარი პოზიციების დაკავება საცალო და საბითუმო ვაჭრობის სფეროში.
,,ჩვენთან ყოველდღიური მოხმარების პროდუქტების ფართო არჩევანია და თამამად შეიძლება ითქვას,რომ საქართველოში არსებულ სუპერმარკეტების ქსელებთან შედარებით ყველაზე დაბალი ფასებია. ჩვენ მომხმარებელს საშუალებას ვაძლევთ ყველა სასურველი ნივთი ერთ ადგილას შეიძინოს.’’ – აცხადებენ კომპანიაში.
კომპანია დაარსების დღიდან ფრანჩაიზის სტრატერგიით მუშაობს. რაც გულისხმობს „საოჯახო შეძენის“ პრინციპს და ფრანჩაიზის გაყიდვების შედეგად ქსელის განვითარებას. „ფურშეტის“ ისტორია უკვე ორ ათეულ წელს ითვლის, პირველმა ფილიალმა მუშაობა 1992 წელს დაიწყო. ოთხი წლის შემდეგ კი უკვე უკრაინის დედაქალაქის, კიევის ცენტრში პირველი ნაციონალური საბითუმო-საცალო სუპერმარკეტი „ფურშეტი“ გაიხსნა. იგი აღმოსავლეთ ევროპის ერთ-ერთი უმსხვილესი ბრენდია. კომპანია ფლობს 100-ზე მეტ მაღაზიას უკრაინაში, მათ შორის 7 სუპერმარკეტ-რესტორანსა და 10 მაღაზიას მოლდოვაში.
ქსელის წარმომადგენლების თქმით, საახალწლოდ „ფურშეტ ჯორჯია“ მომხმარებელს უამრავ აქციასა და საჩუქარს შესთავაზებს, ამასთანავე 2015 წელს უკვე რვა მაღაზიით შეხვდება საქართველოში. დღესდღეობით კომპანია კი 6 სუპერმარკეტს ფლობს საქართველოში, რომლებიც განთავსებულია არამხოლოდ თბილისში, არამედ მარნეულსა და ბათუმში. აღნიშნულ სუპერმარკეტებში ამ ეტაპზე, 400 – ზე მეტი ადამიანია დასაქმებული.
28.11.14
ნათია კეკენაძე
