მაღალმთიანი დასახლების ნუსხაში სიღნაღის მუნიციპალიტეტის კიდევ ორი სოფელი მოხვდა. ადგილობრივი ხელისუფლების თქმით, სპეციალური კრიტერიუმები ბოდბემ და ზემო მაღარომ დააკმაყოფილა. ეს სოფლები, უახლოეს პერიოდში, კანონით გათვალისწინებული შეღავათებით ისარგებლებენ.
სიღნაღის მუნიციპალიტეტში მაღალმთიანი დასახლების სტატუსი, ჯამში, 4 სოფელს აქვს. ესენია: ნუკრიანი, ქვემო მაღარო, ზემო მაღარო და ბოდბე.
მკითხველს შევახსენებთ, რომ მაღალმთიანად ითვლება დასახლება, რომელიც ზღვის დონიდან 1,5 ათას მეტრ სიმაღლეზე და ზევით მდებარეობს. გამონაკლის შემთხვევებში, რელიეფის, ბუნებრივი და დემოგრაფიული პირობების გათვალისწინებით, ეს სტატუსი შეიძლება ზღვის დონიდან 800 მეტრზე ქვევით მდებარე დასახლებამაც მიიღოს. რაც შეეხება მაღალმთიანი რეგიონების მაცხოვრებლებს, ასეთებად ჩაითვლებიან ისინი, რომლებიც წელიწადში მინიმუმ ცხრა თვე ადგილზე ცხოვრობენ და შესაბამისი რეგისტრაცია აქვთ გავლილი.
2016 წელს მთავრობის მიერ დამტკიცებული -„მთის განვითარების შესახებ“ კანონის თანახმად, მაღალმთიან რეგიონებში მცხოვრები ოჯახები პირველ და მეორე ბავშვზე სახელმწიფოსგან ერთი წლის განმავლობაში, ყოველთვიური დანამატის სახით100 ლარს, მესამე და ყოველ შემდგომ ბავშვზე — ორი წლის განმავლობაში არანაკლებ 200 ლარის დახმარებას იღებენ. ფიზიკური პირი საშემოსავლო და ქონების გადასახადებისგან, მეწარმე კი- მაღალმთიანი დასახლების საწარმოს სტატუსით, მოგებისა და ქონების გადასახადებისგან თავისუფლდება.— ეს იმ შეღავათების არასრული ჩამონათვალია, რომელსაც კანონი მაღალმთიან რეგიონებში მცხოვრები მოსახლეობისთვის ითვალისწინებს.
ნინო ზარიძე
