საავტომობილო გზების გარკვეულ მონაკვეთებზე შეზღუდვები მოქმედებს, აღნიშნულს საავტომობილო გზების დეპარტამენტის თავმჯდომარე ვაჟა ფანჩულიძე ამინდის გაუარესებას უკავშირებს და აცხადებს, რომ ზამთრის რეჟიმზე გადასვლა მოხდა.
“ამინდის გაუარესების გამო მცხეთა-სტეფანწმინდა-ლარისის საავტომობილო გზის მიმართულებებით გარკვეული რეჟიმი დაწესდა. ჩვენ გადავედით ზამთრის რეჟიმზე. კერძოდ, გუდაურამდე მოძრაობა თავისუფალია ნებისმიერი სატრანსპორტო საშუალებისთვის, ხოლო გუდაურიდან კობის მიმართულებით მოძრაობა დასაშვებია ყველა სატრანსპორტო საშუალებისთვის მოცურების საწინააღმდეგო ჯაჭვების გამოყენებით“, – განაცხადა ვაჟა ფანჩულიძემ.
კერძოდ, საქართველოს საავტომობილო გზების დეპარტამენტის ინფორმაციით, ინტენსიური თოვის გამო, თბილისი-სენაკ-ლესელიძის საავტომობილო გზის კმ136-კმ157 (ჩუმათელეთი-ხუნევი) მონაკვეთზე აკრძალულია მისაბმელიანი და ნახევრადმისაბმელიანი ავტოტრანსპორტის მოძრაობა, ხოლო დანარჩენი სახის ავტოტრანსპორტის მოძრაობა თავისუფალია. გზის დანარჩენ მონაკვეთებზე ავტოტრანსპორტის მოძრაობა თავისუფალია.
ამასთან, დიდთოვლობის გამო, მცხეთა-სტეფანწმინდა-ლარსის საავტომობილო გზის გუდაური (ფოსტა)-კობის მონაკვეთზე ყველა სახის ავტოტრანსპორტის მოძრაობა დასაშვებია მოცურების საწინააღმდეგო ჯაჭვების გამოყენებით. ორი და მეტი წამყვანი ხიდის მქონე ავტოტრანსპორტის მოძრაობა თავისუფალია.
გარემოს ეროვნული სააგენტოს ცნობით, ზვავსაშიშროების გამო გუდაური(ფოსტა)-კობის მონაკვეთზე ავტოტრანსპორტის მოძრაობა განხორციელდება შეუჩერებლად გავლის რეჟიმში მხოლოდ ზვავდამცავი გვირაბების გავლით. მისაბმელიანი, ნახევრადმისაბმელიანი ავტოტრანსპორტის და 30 ადგილზე მეტი ტევადობის ავტობუსების მოძრაობა გვირაბებში განხორციელდება ცალმხრივად. ამავე გზის, კმ134-კმ135 მონაკვეთზე (დარიალის ხეობა) ავტოტრანსპორტის მიმოსვლისას იკრძალება მათი გაჩერება.
საავტომობილო გზების დეპარტამენტის ინფორმაციით, აღნიშნული რეჟიმებით მოძრაობა განხორციელდება საპატრულო პოლიციის უშუალო ზედამხედველობით და კორდინაციით.
გზის დანარჩენ მონაკვეთებზე ავტოტრანსპორტის მოძრაობა თავისუფალია.
02.12.14