საქართველოს საგარეო საქმეთა სამინისტრო პაკისტანის ქალაქ პეშავარში, სამხედრო საჯარო სკოლაში მომხდარ ტერაქტს გმობს. ამის შესახებ საგარეო საქმეთა სამინისტროს განცხადებაშია ნათქვამი.
“საქართველოს საგარეო საქმეთა სამინისტრო უმკაცრესად გმობს შემზარავ ტერორისტულ აქტს, რომელსაც მრავალი უდანაშაულო ადამიანის, მათ შორის 130-ზე მეტი სკოლის მოსწავლის სიცოცხლე ემსხვერპლა. ჩვენ შეძრწუნებულნი ვართ ტრაგედიის მასშტაბით და ტერორისტთა მხრიდან ჩადენილი ბარბაროსობით, რაც წარმოადგენს უმძიმეს დანაშაულს მთლიანად ცივილიზებული სამყაროს წინააღმდეგ.
ამ მძიმე წუთებში, ჩვენ ვდგავართ პაკისტანელი ხალხის გვერდში და ვუსამძიმრებთ დაღუპულთა ოჯახებს”, – ნათქვამია საგარეო უწყების განცხადებაში.
17.12.14
