საქართველოს პრემიერ-მინისტრი, ირაკლი ღარიბაშვილი იანვრიდან ბიზნესმენებთან შეხვედრებს დაიწყებს. როგორც პრემიერ-მინისტრმა “ექსპო-ჯორჯიაში” წლის შემაჯამებელ პრესკონფერენციაზე განაცხადა, აღნიშნულის მიზანს ცალკეული რაიონების განვითარებაზე ორიენტირებული პროექტების გაცნობა წარმოადგენს, რომლებიც მთავრობამ შეიმუშავა. “ეკონომიკა უნდა განვითარდეს, წარმოება ყველა რაიონში. საჭიროა მეტი ჩართულობა საზოგადოების, კერძო სექტორის. ვფიქრობთ, კიდევ ერთი პროგრამის განხორციელება დავიწყოთ. ჩვენ თითოეული რაიონის დონეზე დავამუშავეთ რაიონებში არსებული რესურსები. ზოგიერთი პროექტის სახითაც გვაქვს ჩამოყალიბებული. მე ვაპირებ იანვარში დავიწყო შეხვედრები ბიზნესმენებთან. ვაპირებთ საჯაროდ შევთავაზოთ მათ ეს პროექტები და გამოვაცხადოთ ინტერესთა გამოხატვა თითოეული რაიონის მიხედვით. თუ მოხდება ყველა რაიონში საწარმოების დაფინანსება და ეს უნდა მოვახდინოთ, ძალიან მალე მივიღებთ დიდ ეფექტს – გაჩნდება ახალი სამუშაო ადგილები, გამოცოცხლდება ეკონომიკა, რაიონები, რეგიონები. საჭიროა მეტი ჩართულობა და მეტი კომუნიკაცია ბიზნესთან. საქართველოში არ არის ფინანსური რესურსის ნაკლებობა. რესურსი არსებობს. ფულის საშუალება არის და ბიზნესის განვითარება შეიძლება”, – განაცხადა პრემიერმა.
26.12.14
